وینزویلا کی ناکہ بندی سے بچ نکلنے والا روسی بحری جہاز قبضے میں لے لیا، عملے کو قانونی کارروائی کا سامنا کرنا ہوگا، ترجمان وائٹ ہاﺅس

واشنگٹن (مانیٹرنگ ڈیسک) وائٹ ہاﺅس نے وینزویلا کی ناکہ بندی سے بچ نکلنے والے روسی بحری جہاز پر قبضے کے بعد ایک بیان میں کہاکہ جہاز کے عملے کو اب قانونی کارروائی کا سامنا کرنا پڑے گا۔ ترجمان وائٹ ہاﺅس کیرولین لیوٹ نے بحر اوقیانوس میں آئل ٹینکر کو قبضے میں لینے کے سوال پر کہا کہ امریکا تمام پابندیوں پر پوری طرح عمل کرائے گا اور جہاز کے عملے کو اب قانونی کارروائی کا سامنا کرنا پڑے گا۔ پریس بریفنگ میں ترجمان وائٹ ہاﺅس کا کہنا تھا کہ گرین لینڈ سے متعلق تمام آپشن ٹیبل پر ہیں، پہلا آپشن ہمیشہ سفارت کاری ہوتا ہے۔ انہوں نے کہا کہ ٹرمپ انتظامیہ وینزویلا کے عبوری حکام سے قریبی رابطے میں ہے، وینزویلا کے عبوری حکمرانوں کے فیصلے امریکا کے بتائے ہوئے ہوں گے، امریکا معاہدے پر وینزویلا اور تیل کی امریکی صنعت کے ساتھ کام کر رہا ہے۔ وائٹ ہاﺅس کی ترجمان نے بتایاکہ تیل کمپنیوں کے سربراہان رواں ہفتے وائٹ ہاﺅس آئیں گے اور ضرورت پڑی تو آئل ورکرز کے تحفظ کے لیے صدر ٹرمپ امریکی فوج استعمال کرنے کا حق رکھتے ہیں، انہوں نے وینزویلا میں انتخابی ٹائم ٹیبل پر بات کرنے کو قبل از وقت قرار دیا۔ یاد رہے کہ امریکی بحریہ اور کوسٹ گارڈز نے وینزویلا کی ناکہ بندی سے بچ نکلنے والے روسی بحری جہاز پر قبضہ کرلیا ہے۔ خبر ایجنسی کے مطابق امریکی بحریہ اور کوسٹ گارڈز طویل عرصے سے اس جہاز کا پیچھاکررہے تھے اور پہلے بھی اس پر قبضے کی کوشش کرچکے تھے۔