بیرون ملک جرائم میں ملوث افراد کی نشاندہی اور دہشتگردی کیلئے فنڈنگ کی روک تھام جدید سافٹ ویئر کے ذریعے کی جائے گی، محسن نقوی

اسلام آباد (ویب ڈیسک) وفاقی وزیر داخلہ محسن نقوی نے کہا ہے کہ بیرون ملک جرائم میں ملوث افراد کی نشاندہی جدید سافٹ ویئر کے ذریعے کی جائے گی۔ وفاقی وزیر داخلہ محسن نقوی نے امریکی سفیر نیٹلی بیکر کی سربراہی میں اعلیٰ سطح کے وفد سے ملاقات کی۔ ملاقات میں فریقین نے پاک امریکہ تعلقات کو مزید مضبوط بنانے اور مشترکہ مفادات کے شعبوں میں تعاون بڑھانے پر اتفاق کیا۔ ملاقات میں دوطرفہ سیکورٹی تعاون، بارڈر مینجمنٹ اور امریکی اداروں جیسے اینٹی ٹیررسٹ سسٹنٹس پروگرام اور بیورو آف انٹرنیشنل نارکوٹکس اینڈ لا انفورسمنٹ کے ساتھ جاری شراکت کو مضبوط بنانے پر تبادلہ خیال کیا گیا۔ مستقبل میں ہر سطح پر بہتر کوآرڈینیشن کے ذریعے پاک امریکہ تعاون کو مزید فروغ دینے کا فیصلہ بھی کیا گیا۔ اس موقع پر وزیر داخلہ محسن نقوی نے کہا کہ بیرون ملک جرائم میں ملوث افراد کی نشاندہی جدید سافٹ ویئر کے ذریعے کی جائے گی اور ایف آئی اے، فیڈرل کانسٹیبلری اور سائبر کرائم ایجنسی کے افسران کے لیے تربیتی پروگرامز جاری رہیں گے۔ انہوں نے کہا کہ امریکی تعاون سے ایف آئی اے میں سینٹر فار ٹرانسفارمیشن کرائم اور اکیڈمی کے قیام کے امور بھی آگے بڑھائے جائیں گے۔ وزیر داخلہ نے کہا کہ ایف آئی اے کے انسداد دہشت گردی ونگ کو فعال بنانے کے لیے امریکی معاونت نہایت اہم ثابت ہوگی۔ یہ وفاقی سطح پر پہلا اینٹی ٹیررسٹ ونگ ہوگا جو صوبوں کے ساتھ موثر کوآرڈینیشن رکھے گا۔ محسن نقوی نے بتایا کہ نیشنل سائبر کرائمز انوسٹی گیشن ایجنسی (این سی سی آئی اے) ملک بھر میں غیرقانونی کال سینٹرز کے خلاف بھرپور کریک ڈاﺅن کر رہی ہے۔ مالیاتی فراڈ اور دہشت گردی کی فنڈنگ کی روک تھام کے لیے جدید سافٹ ویئر ناگزیر ہیں۔ انہوں نے کہا کہ اس ضمن میں امریکہ کا این سی سی آئی اے کے ساتھ تعاون انتہائی اہم ہے۔ امریکی وفد نے پاکستان کی جانب سے سیکورٹی تعاون اور دوطرفہ روابط کے فروغ کے لیے کی جانے والی کاوشوں کو سراہا۔ قائم مقام امریکی سفیر نے اس موقعے پر کہا کہ وزارت داخلہ اور امریکی اداروں کے درمیان مختلف سطح پر جاری تعاون قابل تحسین ہے اور امریکہ پاکستان کے ساتھ اشتراک مزید بڑھانے کے لیے اقدامات جاری رکھے گا۔ اس موقع پر وزیر مملکت داخلہ طلال چوہدری، وفاقی سیکرٹری داخلہ، ڈی جی ایف آئی اے، کمانڈنٹ فیڈرل کانسٹیبلری، ڈی جی نیشنل سائبر کرائمز انوسٹی گیشن ایجنسی، ڈی جی پاسپورٹ اینڈ امیگریشن، آئی جی اسلام آباد پولیس اور دیگر اعلیٰ حکام بھی موجود تھے۔