افغانستان میں شدید بارش اور برفباری نے تباہی مچادی، 61 افراد جاں بحق، 100 سے زائد زخمی

کابل (مانیٹرنگ ڈیسک) افغانستان میں شدید بارش اور برفباری نے تباہی مچادی ہے جس کے نتیجے میں 61 افراد جاں بحق اور 100 سے زائد زخمی ہوگئے ہیں۔ خبر ایجنسی کے مطابق افغان صوبے پروان، وردک، جنوبی قندھار، شمالی جوزجان، فاریاب اور وسطی بامیان سمیت دیگر علاقوں میں بدھ سے برفباری اور بارش کا سلسلہ جاری ہے۔ افغانستان کی نیشنل ڈیزاسٹر مینجمنٹ اتھارٹی نے بتایا کہ حالیہ دنوں میں ہونے والی شدید برفباری اور بارشوں کے نتیجے میں ملک بھر میں 61 افراد جاں بحق اور 110 افراد زخمی ہوئے ہیں۔ حکام نے بتایا کہ کم از کم 458 مکانات مکمل یا جزوی طور پر تباہ ہو گئے ہیں جبکہ شدید برفباری اور برفانی تودے گرنے کے خدشات کے باعث اہم شاہراہیں اور بین الصوبائی سڑکیں بند ہو چکی ہیں، نیز مویشیوں کا بھی بڑے پیمانے پر نقصان ہوا ہے۔