وفاقی کابینہ اجلاس، وزیراعظم کی سوشل میڈیا پر کردار کشی مہم روکنے کیلئے اقدامات کی ہدایت

اسلام آباد:وزیر اعظم عمران خان نے سوشل میڈیا پر غیر اخلاقی ٹرینڈز پر ناراضی کا اظہار کرتے ہوئے کہا کہ مخصوص ایجنڈے پر مبنی کردار کشی کی سوشل میڈیا پر مہم روکنے کے لیے اقدامات کیے جائیں۔ وزیر اعظم عمران خان کی زیرِ صدارت وفاقی کابینہ اجلاس کی اندرونی کہا نی سامنے آئی جس میں وفاقی وزیر مونس الٰہی نے کالا باغ ڈیم منصوبے کا معاملہ کابینہ کے سامنے رکھا۔وفاقی وزیر مونس الٰہی نے کابینہ اجلاس میں کہا کہ کالا باغ ڈیم کے معاملے پر کابینہ کمیٹی تشکیل دی جائے تاہم کابینہ اجلاس میں بعض وفاقی وزرا کی جانب سے اس تجویز کی مخالفت کی گئی۔بعض وزرا نے اپنی رائے کا اظہار کرتے ہوئے کہا کہ سندھ میں انتخابات ہونے جا رہے ہیں، معاملے پر مخالفت ہے، کالا باغ ڈیم پر کمیٹی بنانے کا مناسب وقت نہیں ہے۔اجلاس میں وزیر اعظم عمران خان کے خلاف سوشل میڈیا پر جاری غیر مناسب ٹرینڈ پر بریگیڈیئر اعجاز شاہ آبدیدہ ہوگئے انہوں نے کہا کہ اس معاملے پر سوشل میڈیا دیکھ کر دکھ ہوا میں خود بھی آئی بی کا سربراہ رہا ہوں کبھی منتخب وزیر اعظم کے خلاف ایسی مہم کو نہیں دیکھا وزیر اعظم اور فیملی پر ذاتی حملے کسی صورت بھی تہذیب یافتہ معاشرے کی عکاس نہیں ہے،وفاقی وزرا نے بھی سوشل میڈیا ہر جاری مہم پر تشویش کا اظہار کرتے ہوئے کہا کہ سوشل میڈیا کے سخت قوانین ہونا چاہیے۔ اجلاس میں وزیر اعظم عمران خان نے بھی سوشل میڈیا پر غیر اخلاقی ٹرینڈز پر ناراضی کا اظہار کیا۔ وزیر اعظم نے مخصوص ایجنڈے پر مبنی کردار کشی کی سوشل میڈیا پر مہم روکنے کے لیے اقدامات کی ہدایت کر دی۔