لاپتہ افراد کی واپسی یقینی بنانے کیلئے موثر فیصلے کرنا ہوں گے، آغا حسن بلوچ

اسلام آباد (انتخاب نیوز) لاپتہ افراد کے حوالے سے کابینہ کی قائم کردہ ذیلی کمیٹی نے آئندہ اجلاس میں فرحت اللہ بابراور آمنہ مسعود جنجوعہ کو خصوصی طور پر شرکت کرنے کی دعوت دیدی جبکہ وفاقی وزیر برائے قانون و انصاف سینیٹر اعظم نذیر تارڑ اوروفاقی وزیر سائنس و ٹیکنالوجی آغا حسن بلوچ نے کہاہے کہ لاپتہ افراد کے حوالے سے کمیٹی صرف کاغذات کی حد تک کام نہیں کرے گی بلکہ عملی طور پر نتائج سامنے آئیں گے، ان ماں باپ کے لئے بہت مشکل ہے جن کو پتہ نہ ہو کہ ہمارا بچہ کہاں ہے ہمیں اس معاملے کو سنجیدگی سے لیتے ہوئے لاپتہ افراد کے حوالے سے مو ثر فیصلے کرنا ہونگے۔ جمعرات کو وفاقی وزیر برائے قانون و انصاف سینیٹر اعظم نذیر تارڑ کی صدارت میں لاپتہ افراد کے حوالے سے کابینہ کی قائم کردہ ذیلی کمیٹی کا اجلاس منعقد ہوا،اجلاس میں وفاقی وزیر برائے تخفیف غربت و سماجی تحفظ و چیئرپرسن بے نظیر انکم سپورٹ پروگرام شازیہ مری، وفاقی وزیر برائے سائنس اور ٹیکنالوجی آغا حسن بلوچ ، وفاقی وزیر برائے دفاعی پیداوار محمد اسرار ترین اور وزارت قانون اور وزارت داخلہ کے اعلیٰ افسران نے شرکت کی۔اجلاس میں سینیٹر اعظم نذیر تارڑ نے کہا کہ لاپتہ افراد کے حوالے سے کمیٹی صرف کاغذات کی حد تک کام نہیں کرے گی بلکہ عملی طور پر نتائج سامنے آئیں گے،کمیٹی کے آئندہ اجلاسوں میں تمام مکاتب فکر کو سنا جائے گا اور صوبائی سطح سے بھی تجاویز لی جائیں گی۔ لاپتہ افراد کا معاملہ میرے دل کے بہت قریب ہے، ہمیں اس کمیٹی سے امید ہے کہ لاپتہ افراد کو بازیاب کروایا جائے گا۔ اجلاس میں وفاقی وزیر سائنس و ٹیکنالوجی آغا حسن بلوچ نے اظہار خیال کرتے ہوئے کہا کہ ان ماں باپ کے لئے بہت مشکل ہے جن کو پتہ نہ ہو کہ ہمارا بچہ کہاں ہے ہمیں اس معاملے کو سنجدگی سے لیتے ہوئے لاپرہ افراد کے حوالے سے مو ثر فیصلے کرنے ہونگے اور یہ لوگ جہاں بھی ، جسکے پاس ہیں ان کی واپسی کو یقینی بنانا ہوگا۔ آغا حسن بلوچ نے کہا کہ کمیٹی کے آئندہ اجلاس میں فرحت اللہ بابر کو خصوصی طور پر مدعو کیا جائے گا اور لاپتہ افراد کی جانب سے بطورنمائندہ آمنہ مسعود جنجوعہ کو بھی اجلاس میں شرکت کی دعوت دی جائے گی اور اجلاس میں معاملے کی سنجیدگی کو مدنظر رکھتے ہوئے ہر ہفتے کمیٹی کا اجلاس بلایا جائے ۔ کمٹی اجلاس ہر ہفتے بلانے کی تجویز کو تمام شرکا ءکے منظور کرتے ہوئے ہر ہفتے اجلاس بلانے کا فیصلہ کیا۔