کوئٹہ ریڈ زون دھرنے کے 44 دن مکمل، لواحقین نے سیرینا اور جی پی او چوک بند کردیا

کوئٹہ (انتخاب نیوز) کوئٹہ ریڈ زون میں جاری بلوچ لاپتہ افراد کے لواحقین کے دھرنے کو 44 دن ہوگئے، آج سیرینا اور جی پی او چوک پر روڈ بلاک کیا گیا۔ زیارت واقعے کے بعد گورنر ہاؤس کے سامنے ریڈ زون میں جاری بلوچ لاپتہ افراد کے لواحقین کے احتجاجی دھرنے کو آج 44 دن مکمل ہوگئے۔ دھرنا لواحقین کی کال پر صبح گیارہ بجے سے جی پی او چوک اور سرینا چوک ٹریفک کیلئے بند کردیئے گئے،

لواحقین نے اپنے احتجاجی پروگرام کو وسعت دیتے ہوئے آج ایک مرتبہ پھر کوئٹہ کے دو مین چوک صبح سے لیکر شام پانچ تک ٹریفک کیلئے بند کیئے تھے، جس کی کال وہ دو دن پہلے دے چکے تھے اور عوام سے تعاون کی اپیل کی گئی تھی۔ دریں اثناء لواحقین نے صوبائی حکومت کے ایک وفد کی اس یقین دہانی پر کہ ان سے جلد رابطہ کیا جائے گا اور انکے مسئلے کا حل نکالا جائے گا تب جاکر لواحقین نے اپنا روڈ بلاک احتجاج ختم کیا اور واپس دھرنے کے مقام پر منتقل ہوگئے جہاں دھرنا بدستور جاری رہے گا۔ لواحقین نے کہا کہ وہ انتہائی مجبوری کی حالت میں روڈ بلاک کے احتجاجی پروگرام کو وسعت دے رہے ہیں کیونکہ حکومت ان کے مطالبات پر عملدرآمد کیلئے بالکل بھی سنجیدہ نظر نہیں آرہی۔

انہوں نے مزید کہا کہ ہم دو دن پہلے مذکورہ چوک پر روڈ بلاک کا اعلان کرچکے تھے لیکن پھر بھی افسوس کے ساتھ کہنا پڑتا ہے کہ کچھ شہریوں نے ہمارے پرامن احتجاج کا احترام نہ کرتے ہوئے لواحقین پر گاڑی اور موٹر سائیکل چڑھانے کی کوشش کی تھی۔ ہمیں کوئٹہ کے عام شہریوں کی تکلیف کا بخوبی اندازہ ہے، سوچنے کی بات ہے کہ جب کسی کی روزمرہ زندگی میں تھوڑا سا خلل آجاتا ہے تو لوگ تکلیف میں ہوتے ہیں، ہماری زندگیوں کو تو برسوں سے درد اور تکلیف میں ڈالا گیا ہے۔