تربیلا سے بھی بجلی کی سپلائی میں تعطل، ملک میں بریک ڈاﺅن شدید ہوگیا

کراچی (انتخاب نیوز) تربیلا سے بھی بجلی کی سپلائی میں تعطل آنے کے بعد ملک میں بجلی کا بریک ڈاﺅن شدت اختیار کرگیا۔ ذرائع کے مطابق تربیلا سے بھی بجلی کی سپلائی میں تعطل آگیا ہے جس کے بعد کراچی، حیدرآباد، بلوچستان اور جنوبی پنجاب کے بعد وسطی پنجاب میں بھی بریک ڈاﺅن شروع ہوگیا ہے۔ ذرائع کا کہنا ہے کہ لیسکو کا سسٹم بھی ٹرپ کررہا ہے، گرڈ فریکوئنسی بھی 50 سے نیچے چلی گئی ہے جو تشویشناک ہے، لیسکو کے کئی گرڈ اسٹیشن ایک ساتھ بند کیے جارہے ہیں۔ ذرائع نے بتایا کہ وزارت پاور نے موجودہ بحران کی انکوائری کا حکم دے دیا ہے، اعلیٰ سطح کی کمیٹی 2 روز میں حقائق سامنے لائےگی، وزارت پاور کا دعویٰ ہے کہ رات 9 بجے تک سسٹم کو بحال کردیا جائےگا۔ خیال رہے کہ نیشنل گرڈ میں خرابی سے کراچی سمیت ملک کے مختلف شہروں میں بجلی کا بڑا بریک ڈاﺅن ہوا ہے، حکام کے مطابق صبح کی گئی بجلی رات تک آئےگی۔ ذرائع کے مطابق نیشنل گرڈ میں خلل سے 6 ہزار میگاواٹ بجلی سسٹم سے نکلی ہے، جس کی بحالی کے لیے آپریشن جاری ہے۔ نیشنل گرڈ میں خرابی سے کراچی کا بڑا حصہ بجلی سے محروم ہوگیا ہے، بجلی کی عدم دستیابی کے باعث دھابیجی سے کراچی کو پانی کی فراہمی بھی بند ہے۔ کے الیکٹرک نے دعویٰ کیا ہے کہ اسٹریٹجک تنصیبات اور اسپتالوں کی بجلی بحال کردی گئی ہے، کئی ایک علاقوں میں بھی بجلی کی بحالی کا دعویٰ کیا گیا ہے لیکن بیشتر علاقے اب تک بجلی سے محروم ہیں۔