بلوچستان کی جیلوں میں 60 قیدی سزائے موت کے منتظر

کوئٹہ (انتخاب نیوز) بلوچستان کی جیلوں میں 60 قیدی سزائے موت کے منتظر، صوبے کی مچھ جیل میں آخری پھانسی چھ سال قبل ہوئی تھی، سزائے موت کے بارہ قیدی دس سے پندرہ سال سے پھانسی گھاٹ پر موت کی سزا پر عملدرآمد کا انتظار کررہے ہیں۔ محکمہ جیل خانہ جات کے مطابق بلوچستان کی گیارہ جیلوں میں سے صرف مچھ جیل میں سزائے موت کے قیدیوں کی سزا پر عملدرآمد کیا جاتا ہے۔ اس وقت مچھ جیل میں سزائے موت کے ساٹھ قیدی پابند سلال ہیںجن میں29قیدیوں کی نظرثانی کی درخواستیں بلوچستان ہائی کورٹ ،19قیدیوں کی نظر ثانی درخواستین سپریم کورٹ میں زیر سماعت ہیں جبکہ سات قیدیوں کی رحم کی آخری اپیل صدر مملکت اور پانچ قیدیوں کی رحم آخری اپیل آرمی چیف کے پاس ہیں۔ حکام کے مطابق مچھ جیل میں آخری پھانسی 28 جولائی 2016ءکودی گئی تھی۔ جیل حکام کے مطابق صدر مملکت اور آرمی چیف کے پاس سے رحم کی آخری اپیلیں مسترد ہونے کے سات روز میں قیدی کو پھانسی دی جاتی ہے۔