منگچر میں گیس کی طویل بندش کیخلاف خواتین کا کوئٹہ کراچی شاہراہ پر دھرنا

منگچر (نمائندہ خصوصی) منگچر بازار کے مقام پر خواتین نے گیس کی طویل بندش کیخلاف احتجاج کرتے ہوئے کوئٹہ کراچی شاہراہ پر دھرنا دیکر شاہراہ کو ہر قسم کی ٹریفک کے لیے بند کردیا، جس کے باعث دونوں جانب سینکڑوں گاڑیاں اور ہزاروں مسافر پھنس کر رہ گئے۔ مظاہرین نے میڈیا سے بات چیت کرتے ہوئے کہا کہ پورے ایک سال سے زائد عرصے سے منگچر میں گیس کی سپلائی مکمل طور پر بند ہے، جس سے خواتین کو امور خانہ داری میں مشکلات درپیش ہیں، سردی شدت اختیار کررہی ہے مگر ابھی تک گیس پائپ لائنوں میں گیس تو کجا گیس کی بو بھی نہیں آرہی۔ انہوں نے کہا کہ سردی میں روز بروز اضافہ ہورہا ہے، گیس کی سپلائی معطل ہونے سے غریب عوام کو مشکلات کا سامنا کرنا پڑرہا ہے، ایندھن کے متبادل ذرائع ایل پی جی گیس، کوئلہ اور لکڑی غریب عوام کی قوت خرید سے باہر ہے، خواتین کو امور خانہ داری میں شدید مشکلات درپیش ہیں۔ سردی سے بچوں، بوڑھے بیمار ہورہے ہیں، قدرتی گیس روز مرہ زندگی میں اہم اور ضروری عنصر ہے جس سے صارفین کو محروم رکھا گیا ہے، خواتین مجبور ہوکر سڑکوں پر سراپا احتجاج ہیں، گیس سپلائی کی بحالی تک احتجاج جاری رہے گا۔