غیر قانونی کرش پلانٹس کیخلاف موثر کارروائی کی جائیگی، کمشنر کوئٹہ

کوئٹہ (انتخاب نیوز) کمشنر کوئٹہ ڈویژن سہیل الرحمن بلوچ کی زیر صدارت کوئٹہ شہر میں موجود کرش پلانٹس کے حوالے سے اجلاس منعقد ہوا۔ اجلاس میں ڈپٹی کمشنر کوئٹہ شہک بلوچ، اسسٹنٹ کمشنر ریونیو کوئٹہ بابر خان کے علاوہ محکمہ ماحولیات، جنگلات، ریونیو، معدنیات اور دیگر متعلقہ محکموں کے افسران اور کرش پلانٹس مالکان نے شرکت کی۔ اجلاس میں کرش پلانٹس کے حوالے سے جگہ کے تعین سمیت دیگر امور اور درپیش مسائل کا جائزہ لیا گیا۔ اجلاس میں فیصلہ ہوا کہ عدالت عالیہ کے حکم کے مطابق ہزار گنجی نیشنل پارک کی حدود میں جو کرش پلانٹس غیر قانونی اور بغیر این او سی چل رہے ہیں انہیں فوری طور پر بند کیا جائے، جن کرش پلانٹس کے پاس این او سی موجود ہیں وہ حکومتی ایس او پیز پر عملدرآمد کو یقینی بنائیں۔ کمشنر کوئٹہ ڈویژن نے تمام متعلقہ محکموں کو ہدایت کی کہ اپنے ٹی او آرز اور ایس او پیز پر مکمل عملدرآمد کرائیں اور جن مالکان کو اجازت نامے ملے ہیں وہ دس یوم کے اندر ایس او پیز کو یقینی بنائیں ورگرنہ ان کیخلاف سخت قانونی کارروائی عمل میں لائی جائے گی۔ اجلاس میں یہ بھی فیصلہ ہوا کہ محکمہ جنگلات، محکمہ ریونیو اور محکمہ سیٹلمنٹ اراضیوں کی حد بندی کا عمل جلداز جلد مکمل کرکے اپنی رپورٹ مرتب کریں۔ کمشنر کوئٹہ ڈویژن نے محکمہ معدنیات کو ہدایت کی کہ شہر میں موجود تمام قانونی اور غیر قانونی کرش پلانٹس کی مکمل تعداد اور محکمہ ماحولیات کی جانب سے کتنے کرش پلانٹس کو این او سی جاری ہوئے ہیں۔ ان کی رپورٹ پیش کی جائے۔ سروے آف پاکستان ان علاقوں کے ساتھ ساتھ تکتو کے علاقے کا سروے کر کے نقشہ بناکر محکمہ ماحولیات کو پیش کرے تاکہ مستقبل میں حد بندیوں کا مسلۂ درپیش نہ ہو۔ اجلاس سے خطاب کرتے ہوئے کمشنر کوئٹہ ڈویژن سہیل الرحمن بلوچ نے کہا کہ کوئٹہ اور اس کے گردونواح میں نئے کرش پلانٹس لگانے اور این او سی جاری کرنے پابندی عائد ہے۔ اسی طرح میاں غنڈی اور سعادت موضع کی حدود میں بھی کرش پلانٹس لگانے پر پابندی ہے۔ جب تک علاقوں کی حد بندی کا تعین نہیں ہوتا محکمہ ریونیو، سٹلیمنٹ اور سروے آف پاکستان کا عملہ مشترکہ طور پر سروے کا کام جلد مکمل کریں۔ انہوں نے کہا کہ کرش پلانٹس کے حوالے سے عدالتی حکم کے مطابق من وعن عملدرآمد کیا جائے گا۔ تمام غیر قانونی کرش پلانٹس کے خلاف موثر کارروائی عمل میں لائی جائے گی۔ آخر میں کرش پلانٹس مالکان نے اجلاس کو اپنے درپیش مسائل سے آگاہ کیا جس پر کمشنر کوئٹہ ڈویژن نے ان کے مسائل حل کرنے کی یقین دھانی کرائی۔