مظفر آباد، کار دریائے نیلم میں جا گری، 4 افراد جاں بحق ،ایک زخمی
مظفرآباد(مانیٹرنگ ڈیسک)کشمیر کے دارالحکومت مظفر آباد کی تحصیل نصیرآباد میں کار دریائے نیلم میں جا گری جس کے نتیجے میں ایک ہی خاندان کے 4افراد جاں بحق اور ایک خاتون زخمی ہو گئی ۔ریسکیو حکام کے مطابق کارمظفرآباد سے گائوں جھینگ جارہی تھی کہ شدید بارش کے دوران پھسلن کے باعث سیکڑوں فٹ نیچے دریائے نیلم میں جا گری جس کے نتیجے میں ایک ہی خاندان کے 4 افراد جاں بحق اور ایک زخمی ہو گیا۔ کار کو صبح مقامی لوگوں نے دریا میں گرا ہوا دیکھا۔ مقامی لوگوں اور ریسکیو اہلکاروں نے امدادی کارروائیاں کرتے ہوئے ایک خاتون کو زخمی حالت میں نکال لیا جنہیں ہسپتال منتقل کردیا گیا ۔افسوسناک حادثے میں جاں بحق ہونے والوں میں ایک خاتون اور تین مرد شامل ہیں کہ لاشوں کو نکال کر آبائی گائوں جھینگ روانہ کر دیا گیا۔ حادثے سے متعلق پولیس نے بتایا کہ رات کا وقت ہونے کی وجہ سے کسی کو پتہ نہیں چل سکا، صبح راہ گیروں کی نظر پڑنے پر حادثے کی اطلاع ملی۔
