انڈونیشیا میں سیلاب اور آتش فشاں کی تباہی، 41 افراد ہلاک

کراچی (مانیٹرنگ ڈیسک) انڈونیشیا میں سیلاب اور ٹھنڈے لاوے نے تباہی مچا دی جس کے نتیجے میں 41 افراد جان سے گئے۔ بین الاقوامی نشریاتی ادارے کے مطابق انڈونیشیا کے جزیرے سماٹرا میں طوفانی بارشوں کے بعد سیلاب اور آتش فشاں کے ٹھنڈے لاوے نے 41 افراد کی جان لے لی۔ غیر ملکی میڈیا کا بتانا ہے شدید بارشوں کے باعث آنے والا سیلاب جزیرے سماٹرا پر واقع پہاڑ ماراپی سے نکلنے والے آتش فشاں کے ملبے کو بھی اپنے ساتھ بہا لایا جس سے بے پناہ تباہی ہوئی۔ پہاڑ سے نکلنے والے آتش فشاں کے ملبے میں ریت، اور راکھ شامل ہوتی ہے جو سیلاب کے ساتھ بہہ کر ٹھنڈے لاوے کی شکل اختیار کر لیتا ہے۔ انڈونیشین ڈیزاسٹر رسپانس ایجنسی کے مطابق آتش فشاں سے آنے والے مٹی کے تودوں نے اب تک 100 سے زائد گھروں اور عمارتوں کو نقصان پہنچایا ہے جب کہ سیلاب سے 14 پل بھی متاثر ہوئے ہیں، شدید بارشوں، سیلاب اور ٹھنڈے لاوے کے باعث بہت سے دیہات بھی بہہ گئے ہیں۔