افغانستان کے صوبہ غور اور فاریاب میں سیلاب، جاں بحق افراد کی تعداد 70ہو گئی

کابل (صباح نیوز)افغانستان میں بارشوں اور سیلاب نے تباہی مچا دی ، اموات کی تعداد 70 تک پہنچ گئی ، ہزاروں مکانات بھی تباہ ہو گئے۔ غیرملکی خبررساں ادارے کے مطابق رواں ہفتے افغانستان کے شمالی اور وسطی علاقوں میں شدید بارشوں کے بعد سیلابی صورتحال ہے۔ صوبہ غور اور فاریاب میں بارشوں اور سیلاب کے باعث اموات 70 تک پہنچ گئیں جبکہ کئی افراد لاپتہ ہیں۔صوبے کے ڈیزاسٹر مینجمنٹ ڈیپارٹمنٹ نے ہنگامی ایمر جنسی نافذ کرنے کا اعلان کیا ہے۔ سیلابی صورتحال کے باعث ہزاروں شہریوں نے نقل مکانی شروع کر دی ۔ایک افغان شہری نے بتایا کہ خوفناک سیلاب سب کچھ بہا کر لے گیا، میں اور میرا خاندان حکام کی طرف سے مسجد کے لاﺅڈ سپیکر سے اعلان ہونے کے بعد گھر بار چھوڑ کر حفاظتی مقام کی جانب نقل مکانی کر گئے۔