ٹی20ورلڈکپ،آسٹریلیا کی نمیبیا کیخلاف 9 وکٹ سے فتح،سری لنکا اور نیپال کا میچ بارش کے باعث منسوخ

فلوریڈا(مانیٹرنگ ڈیسک)آئی سی سی ٹی 20 ورلڈ کپ میں سری لنکا اور نیپال کے درمیان ہونے والا میچ بارش کے باعث منسوخ کر دیا گیا۔آئی سی سی مینز ٹی 20 ورلڈ کپ کے 23 ویں میچ میں ابر کرم خوب جم کے برسا جس کے باعث سری لنکا اور نیپال کا میچ منسوخ کر دیا گیا۔میگا ایونٹ کے گروپ ڈی کی سری لنکا اور نیپال کے درمیان فلوریڈا میں ہونے والے میچ میں ٹاس بھی نہ ہو سکی۔
امپائر نے مسلسل بارش کی وجہ سے میچ کو منسوخ کر دیا، اور دونوں ٹیموں کو ایک ایک پوائنٹ دے دیا گیا۔سری لنکا کا یہ تیسرا میچ تھا جسے اپنے ابتدائی دونوں میچوں میں شکست کا سامنا کرنا پڑا تھا، نیپال کا میگا ایونٹ میں یہ دوسرا مقابلہ تھا اور وہ بھی اپنے ابتدائی میچ میں ہار چکی ہے۔دوسری جانب آئی سی سی ٹی 20 ورلڈ کپ میں آسٹریلیا نے نمیبیا کو 9 وکٹوں سے شکست دے دی۔نمیبیا کے 72 رنز کے آسان ہدف کو آسٹریلیا نے 1 وکٹ کے نقصان پر 5.4 اوورز میں حاصل کر کے سپر 8 مرحلے کے لیے کوالیفائی کر لیا ہے۔آسٹریلیا کے ٹریوس ہیڈ نمایاں بیٹسمین تھے جنہوں نے 34 رنز کی ناقابل شکست اننگز کھیلی، ڈیوڈ وارنر 20 رنز بنا کر آؤٹ ہوئے، جبکہ مچل مارش 18 رنز پر ناٹ آؤٹ رہے۔آسٹریلیا کی واحد وکٹ نمیبیا کے بولر ڈیوڈ ویزے نے حاصل کی۔اس سے قبل سر ویوین رچرڈز اسٹیڈیم میں میگا ایونٹ کے گروپ بی کے میچ میں آسٹریلیا نے ٹاس جیت کر نمیبیا کو پہلے بیٹنگ کی دعوت دی۔نمیبیا کی بیٹنگ لائن آسٹریلوی بولرز کے سامنے ریت کی دیوار ثابت ہوئی اور پوری ٹیم 17 اوورز میں 72 رنز پر آؤٹ ہو گئی۔نمیبیا کے 9 بیٹسمین ڈبل فیگرز میں بھی داخل نہ ہو سکے، ٹیم کے کپتان گیرہارڈ ایراسمس 36 رنز بنا کر نمایاں رہے جبکہ مائیکل وین نے 10 رنز بنائے۔کینگرو بولر ایڈم زمپا نے 4 کھلاڑیوں کو آؤٹ کیا، مارکوس اسٹوئنس اور جوش ہیزل ووڈ نے 2،2 جبکہ کپتان پیٹ کمنز اور ناتھن ایلیز نے ایک ایک وکٹ حاصل کی۔میگا ایونٹ کے گروپ بی میں یہ دونوں ٹیمیں آج اپنا تیسرا میچ کھیل رہی ہیں، اس سے قبل کینگروز اپنے دونوں میچوں میں کامیابی سمیٹ چکی ہے۔نمیبیا کو گزشتہ دو میچوں میں سے ایک میں کامیابی اور ایک میں ناکامی کا سامنا کرنا پڑا ہے۔