ملک بھر میں یوم عاشور کے جلوسوں کا اختتام، شہدا کربلا کی قربانیوں کو خراج عقیدت

کراچی (انتخاب نیوز) پاکستان بھر میں یوم عاشور پر مجالس کا انعقاد اور جلوس نکالے گئے۔ یوم عاشور کی مناسبت سے ملک بھر میں سیکورٹی کے انتہائی سخت انتظامات کیے گئے اور اس موقع پر متعدد شہروں میں موبائل فون سروس بھی بند رکھی گئی۔ کراچی میں 10 محرم الحرام کا مرکزی جلوس نشتر پارک سے برآمد ہوا جو اپنے روایتی راستوں سے ہوا حسینیہ ایرانیان کھارادر پر ختم ہوا۔ اس موقع پر کراچی کے مختلف علاقوں میں موبائل فون سروس متاثر رہی اور شہر میں موٹر سائیکل کی ڈبل سواری، اسلحے کی نمائش، ہیلی کیم اور ڈرون اڑانے پر بھی پابندی عائد کی گئی۔ لاہور میں یوم عاشور کا مرکزی جلوس نثا رحویلی اندرون موچی گیٹ سے برآمد ہوا جلوس کربلا گامے شاہ پہنچ کر ختم ہوا۔ پنجاب بھر میں صرف جلوس اور مجالس والے علاقوں میں موبائل فون سروس معطل رہی۔ پشاورکی مختلف امام بارگاہوں سے بھی یوم عاشور کے 12 جلوس برآمد ہوئے پہلا جلوس امام بارگاہ سید علی شاہ رضوی سے برآمد ہوا۔ جلوسوں کی سیکورٹی پر پولیس کے 14 ہزار افسران و اہلکار تعینات تھے۔ جلوس کی گزر گاہوں کو کلیئر کرنے کے لیے بم ڈسپوزل یونٹ کے اہلکارموجود تھے، جبکہ جلوسوں کے طرف جانے والے تمام راستے سیل اور موبائل فون سروس بند رہے۔ کوئٹہ شہر میں عاشورہ کے جلوس کے موقع پر موبائل فون سروس معطل اور موٹر سائیکل کی ڈبل سواری پر پابندی عائد تھی۔ کوئٹہ کا مرکزی جلوس مقررہ راستوں سے ہوتا ہوا نماز مغرب سے قبل امام بارگاہ ہزارہ ناصرآباد پہنچ کر اختتام پذیر ہوا۔ اسلام آباد میں یوم عاشور کا مرکزی جلوس امام بارگاہ کرنل مقبول سے برآمد ہوا جو مقررہ راستوں سے ہوتا ہوا امام بارگاہ قدیمی پر ختم ہوا۔ راولپنڈی میں یوم عاشورکا مرکزی جلوس امام بارگاہ عاشق حسین تیلی محلہ سے برآمد ہوا۔ اس موقع پر اطراف کے علاقوں میں موبائل فون سروس جزوی طور پر معطل رہی ۔