سعودی عرب میں ایکسپورٹ پر کسٹم سروسز فیس ختم

ریاض (صباح نیوز)سعودی عرب میں ایکسپورٹ پر کسٹم سروسز فیس ختم کردی گئی ۔سعودی زکوة ،ٹیکس اور کسٹم اتھارٹی نے کہا ہے کہ 6 اکتوبر 2024 سے ایکسپورٹ پر کسٹم سروسز کی فیس ختم کرنے جبکہ امپورٹ فیس کے نئے میکنزم کے تحت کسٹمز سروس فیس کم کی جائے گی۔ کسٹم اتھارٹی کی جانب سے جاری کردہ نئے ضوابط کے تحت کسٹم سروسزبیان الجمرکی مد میں عائد فیس 15 ریال کردی گئی ۔ یہ فیس ایسے تجارتی سامان کے لیے ہوگی جس کی مالیت 1000 ریال سے زیادہ نہ ہو۔نئے ضوابط کے تحت ایکسپورٹ کے لیے کسٹم خدمات کے لیے منسوخ کی جانے والی فیس مختلف امور کی مد میں حاصل کی جاتی تھیں جن میں کسٹم ڈیٹا پروسیسنگ، لینڈ پورٹ چارجز، پورٹر سروسز، کنٹینرایکسرے، کسٹم ڈیٹا کی انٹری اور نمونوں کے تجزے کی لیبارٹری سروسز شامل ہیں۔کسٹم اتھارٹی کی جانب سے جاری بیان میں مزید کہا گیا کہ اس سے قبل کسٹم سروسز کی مد میں فی کنٹینر کو سکین کرنے کی فیس 100 ریال تھا جبکہ کسٹم انٹری پر 100 ریال اور کسٹم ڈیٹا بیان جمرکی پر 20 ریال وصول کیے جاتے تھے۔نئے کسٹم ضوابط کے بعد درآمدی اشیا کی قیمت پر 0.15 فیصد فیس ہو گی جس میں انشورنس، شپنگ شامل ہے۔ یہ فیس زیادہ سے زیادہ 500 ریال اور کم سے کم 15 ریال ہو گی جبکہ ایسا سامان جن پرکسٹم ڈیوٹی اورٹیکس نہیں ہوگا ، صرف 130 ریال وصول کیا جائے گا۔