ماحول کو صاف ستھرا رکھنے میں درختوں کا کلیدی کردار ،درخت لگا کر ان کی آبیاری کریں،وائس چانسلربلوچستان یونیورسٹی

کوئٹہ (اسٹاف رپورٹر) بلوچستان یونیورسٹی کے وائس چانسلر ڈاکٹر ظہور احمد بازئی نے کہا ہے کہ ماحول کو صاف ستھرا رکھنے میں درختوں کا کلیدی کردار ہے، درخت لگانا صدقہ جاریہ ہے ہم سب کی ذمہ داری ہے کہ درخت لگا کر ان کی آبیاری کریں۔ ان خیالات کا اظہار انہوں نے گزشتہ روز بلوچستان یونیورسٹی میں سالانہ شجرکاری مہم 2025ء میں شجرکاری مہم کا افتتاح کرنے کے موقع پر کیا۔ انہوں نے بلوچستان یونیورسٹی کے باٹینیکل گارڈن میں درخت لگا کر باقاعدہ شجرکاری مہم کا افتتاح کیا۔ اس موقع پر بلوچستان یونیورسٹی کے وائس چانسلر ڈاکٹر ظہور احمد بازئی نے کہا کہ درخت ہماری فلاح کے لیے نہایت اہم ہیں اور ماحول کی بہتری میں ان کا کلیدی کردار ہے۔ انہوں نے اس بات پر زور دیا کہ ہم سب کا فرض ہے کہ ہم اپنے ماحول کو بچانے اور بہتر بنانے کے لیے مل کر کام کریں۔ انہوں نے کہا کہ شجرکاری نہ صرف فضائی آلودگی کو کم کرتی ہے بلکہ اس سے زمین کی زرخیزی میں بھی اضافہ ہوتا ہے۔ انہوں نے کہا کہ درخت انسانوں کے لیے زندگی کی ضرورت ہیں، اور ہمیں انہیں اپنے ماحول کا حصہ بنانے کے لیے ہر ممکن کوشش کرنی چاہیے۔ انہوں نے کہا کہ شجرکاری پروگرام پورے سال جاری رہے گا اور یونیورسٹی کے شعبہ جات میں مختلف اقسام کے درخت لگائے جائیں گے تاکہ ماحول کی بہتری کی کوششوں کو تسلسل فراہم کیا جا سکے۔