لوگ عید کا، بلوچستان کے عوام اپنوں کی مسخ شدہ لاشوں کی دید کے منتظر ہیں، داﺅد شاہ کاکڑ

کوئٹہ (پ ر) لوگ عید کا جبکہ بلوچستان کے عوام اپنوں کی مسخ شدہ لاشوں کی دید کے منتظر ہیں، ماہ رنگ بلوچ کی گرفتاری، مظاہرے پر فائرنگ کی مذمت کرتے ہیں، پرامن مظاہرے کے شہدا و زخمیوں کا خون بلوچستان کی حقیقی آزادی کی حیات ہوگا، ماہ رنگ بلوچ و کارکنان کو فوری رہا کیاجائے۔ صوبائی صدر پاکستان تحریک انصاف بلوچستان داود شاہ کاکڑ نے اپنے جاری بیان میں کہا کہ بلوچ یکجہتی کمیٹی کا لاشوں کے ہمراہ پرامن مظاہرہ سریاب روڈ پر فاشسٹ و فارم 47 حکومت کے نام نہاد حکمرانوں کے ایما پر پولیس نے دھاوا بول کر 26 نومبر 2024 اسلام آباد کے جبر ، ظلم اور قتل وغارت کو دہرایا ہے جسکی مثال پاکستان کے علاوہ کسی مہذب معاشرے میں نہیں ملتی۔ انہوں نے اپنے بیان میں مزید کہا کہ پاکستان تحریک انصاف بلوچستان یکجہتی کمیٹی کی سربراہ ماہ رنگ بلوچ کی جدوجہد کی بھرپور حمایت کا اعلان کرچکی ہے انکے حقوق اور بلوچستان کے عوام کے حقیقی آزادی کے لئے ہر فورم پر ساتھ دیگی، ہم حکومت بلوچستان سے پرزور مطالبہ کرتے ہیں کہ ماہ رنگ بلوچ اور دیگر گرفتار کارکنان کو فوری رہا کر اس واقعہ میں ملوث عناصر کو کیفرکردار تک پہنچایا جائے۔