نوجوانوں کی ذہن سازی کیلئے سوشل میڈیا کا غلط استعمال کیا جارہا ہے، سرفراز بگٹی

کوئٹہ (آئی این پی) وزیراعلیٰ بلوچستان میر سرفراز بگٹی کی صدارت میں آئی ٹی ڈیپارٹمنٹ اور سیلولر آپریٹرز کا اعلی سطحی اجلاس منعقد ہوا جس میں بلوچستان میں آئی ٹی اور ٹیلی کام سیکٹر کی بہتری پر تفصیلی تبادلہ خیال کیا گیا۔ اجلاس کے دوران سیکرٹری آئی ٹی ڈیپارٹمنٹ ایاز خان مندوخیل نے شرکا کو تفصیلی بریفنگ دی۔ وزیر اعلی بلوچستان نے کہا کہ آئی ٹی کے شعبے کو گورننس کی بہتری کے لیے استعمال کرنا وقت کی اہم ضرورت ہے۔ انہوں نے اس بات پر زور دیا کہ انٹرنیٹ سروسز کو بلوچستان کے مخصوص حالات کے مطابق ریگولیٹ کرنا ناگزیر ہے۔ وزیر اعلی نے سوشل میڈیا کے منفی اثرات پر بھی تشویش کا اظہار کرتے ہوئے کہا کہ بعض ریاست مخالف عناصر نوجوانوں کی ذہن سازی کے لیے سوشل میڈیا کا غلط استعمال کر رہے ہیں جس کی روک تھام ضروری ہے۔ انہوں نے ہدایت دی کہ انٹرنیٹ سروسز کی بہتری اور ریگولیشن کے لیے جامع پالیسی مرتب کی جائے تاکہ عوام کو بہتر سہولیات فراہم کی جا سکیں۔ وزیر اعلی نے جدید ٹیکنالوجی کو عوامی فلاح، امن و امان کے قیام اور زراعت و لائیو اسٹاک کے فروغ کے لیے بروئے کار لانے پر بھی زور دیا۔ انہوں نے پی ٹی اے حکام کو ہدایت کی کہ وہ آئندہ اجلاس میں تفصیلی سفارشات کے ساتھ اپنی رپورٹ پیش کریں تاکہ آئی ٹی اور ٹیلی کام کے شعبے کو مزید مستحکم اور موثر بنایا جا سکے۔