مردان میں دہشت گردوں کے خلاف کارروائی،غیر مسلح شہریوں کے اموات پر افسوس ہے ، بیرسٹر سیف

ویب ڈیسک:صوبہ خیبر پختونخوا کے وزیر اعلیٰ کے مشیر برائے اطلاعات بیرسٹر محمد علی سیف نے ہفتے کو ایک بیان میں بتایا کہ ضلع مردان میں سکیورٹی فورسز نے عسکریت پسندوں کو کامیابی سے نشانہ بنایا ہے۔انہوں نے کہا کہ ضلع مردان کے پہاڑی علاقے کاٹلنگ میں عسکریت پسندوں کی موجودگی کی مصدقہ اطلاعات کی بنیاد پر ایک انسداد دہشت گردی کارروائی کی گئی۔ بیان کے مطابق یہ مقام عسکریت پسند عناصر کے ٹھکانے اور نقل و حرکت کے لیے استعمال ہو رہا تھا۔ بیرسٹر سیف نے کہا کہ بعد ازاں موصول ہونے والی معلومات کے مطابق کارروائی کے مقام کے اطراف میں بعض غیر مسلح شہری موجود تھے۔ ’ کارروائی میں غیر مسلح افراد کے مارے جانے کا افسوس ہے، جن میں خواتین اور بچے شامل ہیں۔‘ انہوں نے اسے ایک ’دلخراش‘ اور ’افسوس ناک‘ واقعہ قرار دیا جو عسکریت پسندوں کے مارے جانے کے نتیجے میں رونما ہوا۔ انہوں نے کہا: ’حکومت متاثرہ خاندانوں سے دلی ہمدردی اور تعزیت کا اظہار کرتی ہے اور ان کے ساتھ اس غم کی گھڑی میں کھڑی ہے۔‘’حکومت زخمیوں کو فوری طبی امداد کی فراہمی اور جاں بحق افراد کے لواحقین کے لیے امداد اور معاوضے کی فراہمی یقینی بنارہی ہے۔‘انہوں نے مزید کہا کہ ایسی کارروائیوں کے دوران عام شہریوں کے تحفظ کو ہمیشہ اولین ترجیح دی جاتی ہے، تاہم بعض اوقات پیچیدہ جغرافیہ، دہشت گردوں کی جانب سے شہری آبادی میں چھپنے کی حکمت عملی، اور آپریشن کی ہنگامی نوعیت کے باعث ناخواست نتائج سامنے آ سکتے ہیں۔