امن وامان کی صورتحال کے باعث نماز عید الفطر ودیگر اجتماعات میں سیکیورٹی کا خیال رکھیں، مولانا فضل الرحمان
ویب ڈیسک : جمعیت علمائے اسلام (ف) کے سربراہ مولانا فضل الرحمٰن نے عید الفطر کے موقع پر اہل وطن اور امت مسلمہ کو مبارکباد پیش کی اور امن وامان کی ناقص صورتحال کے باعث عوام کو احتیاط برتنے کا مشورہ دیا۔جے یو آئی (ف) کے میڈیا سیل سے جاری بیان کے مطابق مولانا فضل الرحمٰن کا کہنا تھا کہ عید الفطر کے اس پر مسرت موقع پر اہل وطن اور امت مسلمہ کو مبارکباد پیش کرتاہوں، اللہ کریم بار بار ہمیں یہ خوشیاں نصیب فرمائے اور ہماری عبادات کو شرف قبولیت عطا فرمائے۔ان کا کہنا تھا کہ اس مبارک مہینے اور عید کی اس خوشی کے موقع پر بھی وطن عزیز اور دنیا کے مختلف مقامات پر ہمارے مسلمان بھائی، بہنیں، بزرگ اور بچے دکھ اور تکلیف میں ہیں۔سربراہ جے یو آئی کا کہنا تھا کہ مسلمانوں کو اسلام دشمنوں کی جانب سے مسلسل اذیتیں دی جارہی ہیں، خصوصا غزہ کے مسلمانوں پر اسرائیلی بربریت رمضان کے مقدس مہینے میں بھی جاری رہیں۔ان کا کہنا تھا کہ مسلمانوں کو حضور نبی کریم ﷺ نے جسد واحد قرار دیا ہے اور جسم کا کوئی حصہ تکلیف میں ہو تو پورا جسم اس تکلیف کو محسوس کرتا ہے۔انہوں نے کہا کہ اس وقت دنیا میں جہاں مسلمان تکلیف میں ہیں ہم ان کی تکلیف کو محسوس کرتے ہیں، خوشی کے اس موقع پر اپنے گرد و پیش ضرورت مندوں، فقرا اور حاجت مندوں کی ضروریات کا خیال رکھیں کہ یہی ہمارے پیارے دین کی تعلیمات ہیں ۔مولانا فضل الرحمٰن کا کہنا تھا کہ امن وامان کی ناقص صورتحال کے باعث نماز عید الفطر اور دیگر اجتماعات میں خود بھی سیکورٹی کا خیال رکھیں اور انتظامیہ کے ساتھ بھرپور تعاون کریں اور بے جا اخراجات اور اسراف سے بچتے ہوئے سادگی سے عید منائیں۔ انہوں نے کہا کہ اس رمضان المبارک میں ہمارے بہت سے علما کرام اور جماعتی رہنماؤں کی شہادتوں کے روح فرسا واقعات پیش آئے ، عید کے موقع پر شہدا کے ایصال ثواب کے لئے قرآن خوانی کا اہتمام کیا جائے ۔
