پاکستان سعودی عرب کے ساتھ برادرانہ اور تاریخی تعلقات کو قدر کی نگاہ سے دیکھتا ہے، آرمی چیف

راولپنڈی : آرمی چیف جنرل قمر جاوید باجوہ نے کہا کہ سعودی عرب کی اسلامی دنیا میں خصوصی اہمیت ہے، افغانستان میں انسانی المیے سے بچنے کیلئے منظم کوشش کی ضرورت ہے، پاکستان سعودی عرب کے ساتھ برادرانہ اور تاریخی تعلقات کو قدر کی نگاہ سے دیکھتا ہے۔پیر کو پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ سے سعودی وزیر دفاع کے ملٹری ایڈوائزر میجر جنرل طلال عبداللہ نے ملاقات کی۔ ملاقات کے دوران باہمی دلچسپی کے امور، علاقائی سیکیورٹی اور افغان صورتحال پر بات چیت کی گئی۔ آئی ایس پی آر کے مطابق ملاقات میں دونوں ممالک کے درمیان دفاعی تعاون کے امور پر بھی تبادلہ خیال کیا گیا۔ آرمی چیف جنرل قمر جاوید باجوہ نے کہا کہ سعودی عرب کی اسلامی دنیا میں خصوصی اہمیت ہے، افغانستان میں انسانی المیے سے بچنے کیلئے منظم کوشش کی ضرورت ہے۔ انہوں نے کہا کہ پاکستان سعودی عرب کے ساتھ برادرانہ اور تاریخی تعلقات کو قدر کی نگاہ سے دیکھتا ہے۔ آرمی چیف نے افغانستان میں امن اور مفاہمت کی اہمیت کو اجاگر کیا۔ملاقات کے دوران گفتگو کرتے ہوئے سعودی وزیر دفاع کے ملٹری ایڈوائزر میجر جنرل طلال عبداللہ نے پاکستان کی مسلح افواج کی پیشہ وارانہ مہارت کو سراہا جبکہ انہوں نے مختلف شعبوں میں تعاون بڑھانے کے عزم کا اظہار بھی کیا۔