بابر اعظم کا تیز ترین 16 ون ڈے سنچریاں بنانے کا عالمی ریکارڈ

لاہور (انتخاب نیوز) پاکستان کے کپتان اور شاندار بلے باز بابر اعظم نے ایک بار پھر ریکارڈ بک میں اپنا نام درج کرایا جب وہ اپنی 16ویں ون ڈے سنچری مکمل کرنے والے دنیا کے تیز ترین بلے باز بن گئے۔ بابر اعظم نے لاہور میں آسٹریلیا کے خلاف تیسرے ون ڈے کے دوران سنچری بنا کر 16 ون ڈے سنچریاں بنانے والے سب سے کم اننگز میں جنوبی افریقہ کے ہاشم آملہ کو پیچھے چھوڑ دیا۔27 سالہ کرکٹر نے یہ سنگ میل اپنے ون ڈے کیریئر کی 84 ویں اننگز میں حاصل کیا۔ آملہ نے 94 اننگز میں 16 سنچریاں سکور کی تھیں۔ کوئی اور بلے باز 100 سے کم اننگز میں 16 سنچریاں نہیں بنا سکا۔ ویرات کوہلی اس فہرست میں تیسرے نمبر پر ہیں اور انہوں نے 110 اننگز کھیل کر 16 ون ڈے سنچریاں مکمل کیں۔ڈیوڈ وارنر نے بھی 110 اننگز میں 16 سنچریاں سکور کی تھیں، ایرون فنچ نے 116 اننگز کھیل کر 16 سنچریاں بنائیں۔اس سے قبل تین میچوں کی سیریز کے پہلے ون ڈے میں بابر 4000 ون ڈے رنز مکمل کرنے والے تیز ترین ایشین بلے باز بن گئے تھے، وہ ہاشم آملہ کے ون ڈے میں تیز ترین 4000 رنز بنانے کے ریکارڈ کو برابر کرنے میں صرف ایک اننگز سے پیچھے تھے۔ بابر نے اس سے قبل 81 ویں اننگز میں اپنی 14 ویں سنچری اور 76 ویں اننگز میں 13 ویں سنچری بنائی تھی جو دونوں ہی متعلقہ ترتیب نمبر کے لیے تیز ترین تھیں۔