مکران کے ساحل پر شدید زلزلہ آسکتا ہے، سونامی کا خطرہ موجود، ماہرین
اسلام آباد (انتخاب نیوز) مکران کے ساحل میں کسی وقت بھی شدید زلزلہ آسکتا ہے، ماہرین نے خبردار کردیا۔ ڈائریکٹر نیشنل سونامی سینٹر امیر حیدر نے پسنی میں آنے والے زلزلے کے بعد سونامی کے خطرے سے متعلق وضاحت کرتے ہوئے اپنے بیان میں ڈائریکٹر نیشنل سونامی سینٹر امیر حیدر کا کہنا تھا کہ پسنی میں آنے والا زلزلہ سمندر میں سبڈکشن زون میں تھا۔ ڈائریکٹر نیشنل سونامی سینٹر کے مطابق اس کے بعد ایک اور آفٹر شاکس بھی آیا، پانچ کی شدت کے زلزلوں سے سونامی پیدا نہیں ہوتا تاہم 6.5 سے زائد شدت کے زلزلے سے سونامی کا خطرہ رہتا ہے۔ خیال رہے کہ آج شام ساڑھے 6 بجے کے قریب مکران ڈویژن کے مختلف علاقوں میں زلزلے کے جھٹکے محسوس کیے گئے تھے۔ زلزلہ پیما مرکز کے مطابق زلزلے کے جھٹکے گوادر، پسنی، اورماڑہ اور کیچ میں محسوس کیے گئے۔ زلزلہ پیما مرکز کا کہنا تھا کہ زلزلے کی شدت 5.6 اور گہرائی 30 کلو میٹر ریکارڈ کی گئی، زلزلے کا مرکز گوادرکی تحصیل پسنی کے قریب تھا۔
