پاکستان اور برطانیہ کے درمیان مجرموں کی تحویل کا معاہدہ طے پاگیا
لندن (انتخاب نیوز)پاکستان اور برطانیہ کے درمیان مجرموں اور امیگریشن کے قوانین کی خلاف ورزی کرنے والوں کی واپسی کے معاہدے پر دستخط ہوگئے جس کے تحت پاکستان اور برطانیہ اپنے سزا یافتہ مجرمان کو ایک دوسرے کے ممالک واپس بھیج سکیں گے، معاہدے سے صرف ایسے شہریوں کو واپس لانے کی اجازت ہوگی جن کو متعلقہ عدالتیں سزائیں سنا چکی ہیں۔برطانوی وزیرداخلہ پریتی پٹیل نے ٹوئٹر پر لکھا کہ مجھے فخر ہے کہ میں نے اپنے پاکستانی دوستوں کے ساتھ مجرمان اور امیگریشن کے قوانین کی خلاف ورزی کرنے والوں کی واپسی کے لیے اہم معاہدے پر دستخط کیے۔ان کا مزید کہنا تھا کہ معاہدے سے ظاہر ہوتا ہے کہ ہمارے امیگریشن کے حوالے سے نئے پلان عمل درآمد شروع ہوگیا ہے۔خیال ر ہے کہ رواں سال جنوری میں برطانیہ کے ساتھ تحویل مجرمان کے معاہدے کے حوالے سے بنائی گئی خصوصی کمیٹی نے کہا تھا کہ برطانیہ کے ساتھ مجرمان کی واپسی کے معاہدے کو بہترین عوامی مفاد میں دستخط کیا جائے گا۔
