گرے لسٹ سے نکلنے کا کریڈٹ ملکی قیادت اور تمام اداروں جاتاہے،حنا ربانی کھر

پیرس (انٹرنیشنل ڈیسک)فیٹف کا 2 روزہ اجلاس پیرس میں ہوا جس میں پاکستان کا نام گرے لسٹ سے نکالنے کا جائزہ لیا گیا۔اجلاس میں پاکستانی وفد کی قیادت وزیرمملکت برائے خارجہ امورحنا ربانی کھر نے کی۔ اجلاس کے بعد باقاعدہ فیٹف نے پاکستان کو گرے لسٹ سے نکالنے کا اعلان کیا۔

ایف اے ٹی ایف کے اعلان کے بعدوزیرمملکت برائے خارجہ نے میڈیا سے بات کرتے ہوئے کہا کہ فنانشل ایکشن ٹاسک فورس (ایف اے ٹی ایف) کے حوالے سے پاکستانی قوم طویل عرصے سے خوش خبری کا انتظار کر رہی تھی۔پیرس سے ویڈیو لنک پر میڈیا سے گفتگو کرتے ہوئے حنا ربانی کھر نے کہا کہ فیٹف نے پاکستان کی طرف سے منی لانڈرنگ اور ٹی ایف ایشوز پر کوششوں کو تسلیم کیا، یہ سب سیاسی اتفاق رائے کے بغیر ممکن نہیں تھا، ملک کی قیادت اور تمام اداروں کا شکریہ کہ انہوں نے اس میں بڑا کردار ادا کیا۔ اس کامیابی کا کریڈٹ تمام سیاسی اداروں کو بھی جاتا ہے، ہم نے 2021 کے ایکشن پلان پر مہینوں میں کام مکمل کر کے ان کے ہاتھ میں دے دیا، تمام سیاسی جماعتوں کا اس کامیابی میں کردار رہا ہے۔