کوئٹہ، ویگو گاڑی میں سوار لوگوں نے فائرنگ کی جس سے مظاہرین میں ایک شخص ہلاک ہوا, میرضیالانگو

کوئٹہ (انتخاب نیوز)بلوچستان کے وزیر داخلہ میر ضیا اللہ نے کہا ہے کہ بلوچستان میں صورتحال کنٹرول میں ہے تاہم کوئٹہ شہرمیں تحریک انصاف کے کارکنوں کے احتجاج کے دوران ایک شخص جاں بحق اور چھ پولیس اہلکاروں سمیت 13 افراد زخمی ہوئے ہیں۔بی بی سی سے فون پربات کرتے ہوئے ان کا کہنا تھا کہ بلوچستان میں کوئٹہ کے علاوہ جن علاقوں میں احتجاج کیا گیا اب وہاں احتجاج ختم ہوگیا ہے۔ان کا کہنا تھا کہ کوئٹہ میں احتجاج کے دوران ایک شخص ہلاک ہوا جبکہ مظاہرین میں سے سات زخمی ہوئے ہیں۔ان کا دعویٰ ہے کہ مظاہرین کے حملوں میں چھ پولیس اہلکارزخمی ہو گئے ہیں۔ان کا کہنا تھا کہ انھوں نے امن وامان کی صورتحال سے متعلق اجلاس کی صدارت کی ہے اور بلوچستان میں بعض ہائی ویز کو مظاہرین نے بند کیا تھا لیکن اب ان سب کو کھول دیا گیا ہے۔تحریک انصاف کے کارکنان نے کوئٹہ میں احتجاجی دھرنا کینٹ میں ایئرپورٹ روڈ پرکوئٹہ کینٹ کے مین گیٹ کے سامنے دیا تھا۔تحریک انصاف کا کارکن اسی علاقے میں احتجاج کے دوران ہلاک ہوا۔تحریک انصاف کے کارکنوں اوررہنماؤں نے کارکن پرفائرنگ اوراس کی ہلاکت کا الزام سیکورٹی فورسز پرعائد کیا ہے تاہم وزیرداخلہ نے اس الزام کو مسترد کیا۔انھوں نے دعویٰ کیا کہ ایک ویگو گاڑی میں سوار لوگوں نے فائرنگ کی ہے جس سے مظاہرین میں سے ایک شخص ہلاک ہوا ہے۔انھوں نے کہا کہ اس ویگو کی تلاش اورملزمان کی گرفتاری کے لیے ہدایات جاری کر دی گئی ہیں۔