پاکستان میں ذوالحج کا چاند نظر آگیا، عیدالاضحی 29 جون کو ہوگی

کراچی (انتخاب نیوز) ذوالحج 1444ھ کا چاند نظر آگیا، عیدالاضحی 29 جون کو ہوگی۔ ذو الحج کا چاند دیکھنے کیلئے مرکزی رویت ہلال کمیٹی کا اجلاس کراچی میں ہوا۔ چیئرمین مرکزی رویت ہلال کمیٹی مولانا عبدالخبیر آزاد نے ذوالحج کا چاند نظر آنے کا اعلان کردیا۔ کراچی میں پریس کانفرنس کرتے ہوئے مرکزی رویت ہلال کمیٹی مولانا عبدالخبیر آزاد کا کہنا تھاکہ ملک کے کئی مقامات پر چاند نظر آنے کی شہادتیں موصول ہوئیں۔ انہوں نے کہا کہ اتفاق رائے سے فیصلہ کیاگیا کہ یکم ذی الحج 1444 ہجری 20 جون بروز منگل کو ہوگی اور عید الاضحی 29 جون بروز جمعرات کو ہوگی۔ دوسری جانب گزشتہ روز سعودی عرب میں ذی الحجہ کا چاند نظر آگیا تھا، حج کا رکن اعظم وقوفِ عرفہ 27 جون منگل کو ادا کیا جائے گا۔ سعودی عرب میں عیدالاضحی 28 جون کو منائی جائے گی، اس کے علاوہ دبئی سمیت خلیجی ممالک میں بھی عیدالاضحی 28 جون کو منائی جائے گی۔ چیئرمین مرکزی رویت ہلال کمیٹی مولانا عبدالخبیر آزاد نے دفتر محکمہ موسمیات میں اجلاس کی صدارت کی۔ اجلاس میں زونل رویت ہلال کمیٹی کراچی کے اراکین بھی شریک ہیں۔ وزارت مذہبی امور، محکمہ سپارکو، محکمہ موسمیات اور وزارت سائنس و ٹیکنالوجی کے نمائندے بھی اجلاس میں موجود تھے۔