بی این پی کے وڈھ میں گرینڈ آپریشن کے الزامات کو مسترد کرتے ہیں، حکومت بلوچستان

کوئٹہ(مانیٹرنگ ڈیسک)بلوچستان حکومت نے وڈھ میں مبینہ گرینڈ آپریشن کے حوالے سے بی این پی مینگل کے رہنما آغا حسن بلوچ کے الزامات کو سختی سے مسترد کر دیا ہے۔اتوار کو جاری ہونے والے ایک بیان میں حکومت نے کہا کہ یہ الزامات بے بنیاد ہیں اور حالات کو خراب کرنے کی کوشش کی گئی ہے۔ بیان میں یہ بھی کہا گیا ہے کہ بی این پی مینگل کے رہنما سردار اختر مینگل سے الگ الگ مواقع پر اس معاملے کے بارے میں مشاورت کی گئی اور انہیں آگاہ کیا گیا ،جس پر انہوں نے رضامندی دی۔بیان میں مزید کہا گیا ہے کہ سردار مینگل نے اپنی پارٹی کے دو نمائندوں کو اجلاسوں میں شرکت کی تجویز دی تھی لیکن یہ نمائندے شرکت کرنے میں ناکام رہے اور انہوں نے اپنے پارٹی سربراہ کی ہدایات کو نظر انداز کیا۔بیان میں کہا گیا ہے کہ اس سے ان کی وفاداری اور پارٹی رہنما اصولوں پر عمل کرنے پر سوالات اٹھتے ہیں۔بیان میں سردار اخترمینگل سے مطالبہ کیا گیا کہ وہ اس بات کی تحقیقات کریں کہ ان کی ہدایات پر ان کے نمائندوں نے عمل کیوں نہیں کیا، کیونکہ ایسے الزامات ان کی پارٹی کنٹرول پر سوالیہ نشان ہے۔بیان میں یقین دہانی کرائی گئی کہ کوئی گرینڈ آپریشن نہیں کیا جائے گا، کیونکہ امن و امان برقرار رکھنا حکومت کے لیے انتہائی اہمیت کا حامل ہے۔ بیان میں مزید کہا گیا کہ تمام اختلافات کے برعکس سردار اختر مینگل بلوچستان کے ایک تجربہ کار سیاستدان ہیں اور حکومت ان کو قدر کی نگاہ سے دیکھتے ہیں۔