نگران وزیر اعلیٰ بلوچستان کا کانگو وائرس سے متاثرہ ڈاکٹر کی موت پر اظہار افسوس

کوئٹہ (صباح نیوز)نگران وزیر اعلیٰ بلوچستان میر علی مردان خان ڈومکی کا پیشہ ورانہ فرائض کی ادائیگی کے دوران کانگو وائرس سے متاثرہ ڈاکٹر شکراللہ جان کی موت پرخاندان سے تعزیت و افسوس کا اظہار کیا ۔یاد رہے کہ فرائض کی ادائیگی کے دوران وائرس کا شکار ہونے والے ڈاکٹر شکراللہ جان آغا خان اسپتال کراچی میں زیر علاج تھے۔نگران وزیر اعلیٰ بلوچستان میر علی مردان خان ڈومکی نے کہا کہ جاں بحق ڈاکٹر شکراللہ جان کو خراج عقیدت پیش کرتے ہیں ، گزشتہ روز ائیر ایمبولینس کے ذریعے تین ڈاکٹرز ، ایک کنسلٹنٹ ، ایک اسٹاف نرس اور دو پیرا میڈیکل اسٹاف کو کراچی منتقل کیا گیا تھا ،ان کا مزید کہنا تھا کہ وائرس سے متاثرہ ڈاکٹرز اور معاون طبی عملے کا علاج حکومت بلوچستان کے اخراجات پر آغا خان اسپتال کراچی میں جاری ہے ، نگران وزیر اعلیٰ میر علی مردان خان ڈومکی نے کہا کہ وائرس رپورٹ ہوتے ہی سول اسپتال اور دیگر طبی اداروں کے لئے ایس او پیز جاری کردئیے گئے تھے ، نگران وزیر اعلیٰ کا کہنا تھا کہ وائرس سے متاثرہ مشتبہ تمام افراد کے لئے کوئٹہ میں خصوصی وارڈ قائم کیا گیا ہے۔