جارحیت کے ذریعے اسرائیل خود اپنے ہاتھوں اپنی قبر کھود رہاہے، ترجمان

بیت المقدس (مانیٹرنگ ڈیسک)اسلامی تحریک مزاحمت (حماس)کے بیرون ملک امور کے سربراہ خالد مشعل نے کہا ہے کہ جارحیت کے ذریعے اسرائیل خود اپنے ہاتھوں اپنی قبر کھود رہاہے، دنیا دیکھ رہی ہے کہ اسرائیل اس وقت تاریخ کی بدترین جارحیت کا مظاہرہ کررہا ہے،غزہ پر بارود کی بارش برسائی جارہی ہے،اسرائیل کو اس کی قیمت چکانا ہو گی ۔ٹی وی تقریر میں انہوںنے شہید رہنما صالح العاروری اور ان کے ساتھی شہدا کو خراج عقیدت پیش کرتے ہوئے کہا کہ ہماری گفتگو ان سات چاندوں، ان عظیم شہدا اور قائدین کے بارے میں ہے جن کو ہم نے اپنے ساتھ ملایا۔ ہم ان کے ساتھ جئے، ہم نے ان کے ساتھ جہاد اور مزاحمت کی شراکت داری حاصل کی، جس میں فتح، آزادی اور حق واپسی کے لیے درد، امید، آرزو اورتمنا شامل تھی۔مشعل نے کہا کہ یہ معزز اور پیارے شہدا؛ الشیخ صالح العاروری ابو محمد، بھائی سمیر فندی ابو عامر، بھائی عزام الاقرع، ابو عبداللہ، بھائی محمود شاہین، بھائی احمد حمود، بھائی محمد الرئیس، اور بھائی محمد باشاہ ہیں۔ ہم ان کی شہادت کو فلسطین کے قافلہ شہدا کا قابل فخر حصہ سمجھتے ہیں۔انہوں نے کہا کہ پیارے بھائی شہید الشیخ صالح العاروری کو ہم اس وقت سے جانتے ہیں جب وہ جیل سے پہلے اور جیل کے دوران مغربی کنارے میں تھے، القسام بریگیڈز کے ایک بانی رہنما کے طور پر، ایک کارکن جس نے اپنی جان دی۔ قابض دشمن کے خلاف مزاحمت کے سفر میں ان تھک جدو جہد کی۔ جب 2010 میں انہیں زبردستی اپنا وطن فلسطین چھوڑنے پر مجبور کیا گیا تو وہ اپنے بھائیوں کے ساتھ اپنی ذمہ داری اور کردار کو جاری رکھنے کے لئے قیادت میں شامل ہو گئے۔انہوں نے کہا کہ قائدین کی شہادت ایک انتہائی اہم حقیقت کو ثابت کرتی ہے جس کو ہر روز تقویت ملتی ہے کہ جس طرح شہادت کا راستہ قائدین کا انتخاب ہوتا ہے اسی طرح یہ سپاہیوں کا انتخاب ہوتا ہے،اس میں کوئی پیچھے نہیں رہتا اور نہ ہی کوئی اس سے پیچھے ہٹا ہے۔ اس سے کوئی روگردانی نہیں کرتا ہے بلکہ یہ ہمارا مطالبہ اور ہدف ہے اور ہم اس کے لئے تیار ہیں اور ہم نے خود کو اس کے راستے پر کھڑا کر دیا ہے۔خالد مشعل نے کہا کہ دنیا دیکھ رہی ہے کہ اسرائیل اس وقت تاریخ کی بدترین جارحیت کا مظاہرہ کررہا ہے۔ اس جارحیت کا شکار فلسطینی قوم کے نہتے اور معصوم لوگ ہیں،ان پر بارود کی بارش برسائی جا رہی ہے۔ مگر بارود قابض اسرائیل کو بچا نہیں پائے گا بلکہ دشمن کو اس کی قیمت چکانا ہوگی۔ جارحیت کے ذریعے اسرائیلی دشمن خود اپنے ہاتھوں اپنی قبر کھود رہاہے۔