تھائی لینڈ میں آتش بازی کا سامان بنانیوالی فیکٹری میں دھماکے سے اموات 23 ہوگئیں

بنکاک (مانیٹرنگ ڈیسک) شمالی تھائی لینڈ میں آتش بازی کا سامان بنانے والی فیکٹری میں ہونے والے دھماکے کے نتیجے میں صوبائی حکام کی جانب سے 23 مزدوروں کی ہلاکت کی تصدیق کردی گئی ہے۔ ہلاکتوں کی تعداد کا اعلان صوبہ سپہان بری کے حکام نے کیا جہاں دوپہر کے وقت یہ واقعہ پیش آیا۔ قدرتی آفات کی روک تھام کے ادارے کی جانب سے بیان میں کہا گیا ہے کہ وہ سائٹ کو محفوظ بنانے اورمتاثرہ افراد کی مدد کرنے کے لیے کام کر رہے ہیں۔ حکام کے مطابق دھماکے کی نوعیت جاننے کے لیے تحقیق کی جارہی ہے۔ یاد رہے کہ دھماکہ چائنیز کیلینڈر کے مطابق نئے سال کے آغاز سے ایک ماہ قبل ہوا ہے۔ نیو ائیر کی مناسبت سے اس وقت آتش بازی کے سامان کی مانگ بہت زیادہ بڑھی ہوئی ہے۔ امدادی کارکنوں کے مطابق کوئی شخص زندہ نہیں بچا اور صوبائی حکام کی جانب سے بھی اس حادثے میں کسی بچ جانے والے کا کوئی ذکر نہیں کیا گیا۔ اس طرح محکمہ پولیس کی طرف سے بچ جانے والوں کی تعداد کے بارے میں دیے گئے بیانات متضاد لگ رہے ہیں۔ سپہان بری بنکاک کے شمال مغرب میں تقریباً 95 کلومیٹر (60 میل) کے فاصلے پر واقع ہے، جوچاول کی کاشت کے لیے تھائی لینڈ کا مرکزی علاقہ ہے۔ تھائی لینڈ کے وزیر اعظم سریتھا تھاوسین جو ان دنوں ورلڈ اکنامک فورم کے لیے سوئٹزرلینڈ میں ہیں، انہیں علاقائی پولیس کمانڈر نے فون پر بتایا کہ دھماکے کے وقت فیکٹری میں 20 سے 30 مزدور موجود تھے۔ جن میں سے کوئی بھی نہیں مل سکا۔ سپہان بری میں ریسکیوادارے کے ایک امدادی کارکن کرتسادا مانی نے ابتدائی طور پر 15 تا 17 ہلاکتوں کا اندازہ لگایا تھا۔ انہوں نے کہا کہ لاشیں اتنی بری طرح مسخ ہو چ±کی ہیں اور ان کے ٹکڑوں کی گنتی مشکل ہے۔ مقامی امدادی کارکنوں کی جانب سے سوشل میڈیا پر پوسٹ کی گئی تصاویر میں سیاہ دھوئیں کا ایک گہرا شعلہ دکھائی دے رہا ہے۔آن لائن پوسٹ تصاویر میں دکھایا گیا ہے کہ فیکٹری جل کر خاکستر ہو گئی ہے۔ قومی پولیس کے سربراہ تورسک سکویمول نے مقامی خبروں کی تصدیق کرتے ہوئے اعتراف کیا ہے کہ نومبر 2022 ءمیں بھی فیکٹری میں ایک دھماکہ ہوا تھا۔ جس کے نتیجے میں ایک مزدور ہلاک اور تین دیگر شدید زخمی ہو گئے تھے ان کا کہنا تھا کہ پولیس اس معاملے کی تحقیقات کررہی ہے اور مبینہ طور پر اس میں ملوث ہونے والوں کیخلاف شواہد ملنے کی صورت میں قانونی کارروائی کی جائے گی۔