رﺅف حسن نے بھارتی صحافی کو اشتعال انگیز اور خوفناک پیغامات بھیجے، عطا تارڑ

اسلام آباد (انتخاب نیوز) وفاقی وزیر اطلاعات عطا تارڑ نے تحریک انصاف کے ترجمان رﺅف حسن کے غیر ملکی عناصر سے روابط پر ردعمل سامنے آیا ہے۔ اپنے بیان میں عطا تارڑ کا کہنا تھاکہ رﺅف حسن نے بھارتی صحافی کو اشتعال انگیز اور خوفناک پیغامات بھیجے ہیں، پی ٹی آئی کا ملک دشمنی پر مبنی ایجنڈا ایک بار پھر بے نقاب ہوچکا ہے، فارن فنڈڈ اور ملک دشمن ایجنڈے پر کار بند جماعت غیر ملکی آقاﺅں کا سہارا لے رہی ہے، فارن فنڈڈ جماعت نے پہلے سائفر کے ذریعے ملک کی خارجہ پالیسی کو نقصان پہنچایا۔ انہوں نے الزام عائد کیا کہ پی ٹی آئی بھارت کا اسپانسرڈ ایجنڈا لے کر چل رہی ہے، پی ٹی آئی کو بھارتیوں نے بیرون ملک سے فنڈنگ کی جو تحقیقات میں سامنے آچکی، فارن فنڈڈ ٹولے نے ملک دشمنی کی ہرحد عبور کرلی، اب سمجھ آ رہی ہے کہ 9 مئی کے حملے کیوں کیے گئے۔ عطا تارڑ کا یہ بھی کہنا تھا کہ پی ٹی آئی کا اسلام آباد میں سوشل میڈیا سیل ملک دشمنوں سے روابط کا بڑا ذریعہ تھا، پی ٹی آئی کے سوشل میڈیا سیل کے ذریعے فوج اور سپہ سالار کے خلاف مہم چلائی جا رہی تھی۔ انہوں نے کہا کہ رﺅف حسن کے بھارتی صحافی سے رابطے ثابت کرتے ہیں کہ وہ ملک دشمن قوتوں کے کہنے پر مہم چلا رہے ہیں۔