ریکوڈک منصوبے کے تحت بلوچستان سے تعلق رکھنے والے انجینئرز تربیتی پروگرام کیلئے ارجنٹینا روانہ

نوکنڈی (نامہ نگار) ریکوڈک منصوبے کے تحت بلوچستان سے تعلق رکھنے والے انجینئرز تربیتی پروگرام کے لیے ارجنٹینا روانہ۔ ریکوڈک منصوبے کے تحت چلنے والے تعلیمی ترقیاتی پروگرام، انٹرنیشنل گریجویٹ ڈویلپمنٹ پروگرام کے تحت بلوچستان کے مختلف علاقوں سے تعلق رکھنے والے آٹھ ہونہار انجینئرز کو اٹھارہ مہینے کے تربیتی پروگرام کے لیے بیرک مائننگ کارپوریشن کی ارجنٹینا میں ویلاڈیرو پروجیکٹ کیلئے روانہ کردیا گیا۔ یہ اقدام ریکوڈک مائننگ کمپنی کے اس عزم کی عکاسی کرتا ہے جس کے تحت وہ مقامی نوجوانوں کو بین الاقوامی معیار کی تعلیم اور پیشہ ورانہ تربیت کے مواقع فراہم کرکے انہیں ملک و قوم کے لیے ایک قیمتی اثاثہ بنانا چاہتے ہیں تاکہ نوجوان مستقبل میں ریکوڈک کمپنی میں ایک مثبت کردار ادا کرسکیں۔ یاد رہے ریکوڈک منصوبے کے تحت اس سے قبل 2023ءمیں نو، دس انجینئرز پر مشتمل دو گروپ پہلے ہی سے ارجنٹینا، زیمبیا میں قائم بیرک منصوبے میں مائننگ کے شعبے میں تربیت حاصل کررہے ہیں۔ اس موقع پر منصوبے کے نمائندوں کا کہنا تھا کہ یہ عملی تجربہ انہیں عالمی معیار کے جدید مائننگ آپریشن کی سمجھ بوجھ اور مہارتیں فراہم کریگا اور امید کرتے ہیں اس پروگرام کی تکمیل کے بعد یہ انجینئرز واپس آکر ریکوڈک پروجیکٹ کا حصہ بنیں گے اور اپنی کمیونٹی میں مثبت تبدیل کا باعث بنیں گے۔