ماڑی گیس کمپنی ٹریفک حادثے میں جاں بحق نوجوانوں کے اہلخانہ کی دادرسی کریں، غلام نبی مری

کوئٹہ: بلوچستان نیشنل پارٹی کے مرکزی کمیٹی کے ممبر غلام نبی مری نے اپنے ایک بیان میں ماڑی گیس کمپنی کے اعلی حکام سے مطالبہ کیا ہے کہ کوہلو میں ماڑی گیس کمپنی کی گاڑی کی ٹکر سے شہید ہونے والے 2غریب نوجوانوں عبدالمالک شیرانی مری ولد سمیل خان مری اور شاہ دوست ولد حاجی بہاول خان پیردادانی مری کے اہل خانہ کے لئے فوری طور پر معاوضے کی فراہمی کی جائے ۔ انہوں نے کہا کہ 16ستمبر کو کوہلو میں ماڑی گیس کمپنی کی گاڑی نے مذکورہ دونوں نوجوانوں کو کچل دیا تھا جس کے نتیجے می عبدالمالک شیرانی مری ولدسمیل خان مری موقع پرجاں بحق جبکہ شاہ دوست ولدحاجی بہاول خان پیردادانی مری شدید زخمی ہوا تھا جسے زخمی حالات میں ملتان ریفر کردیا گیا تھا تاہم وہ زخموں کی تاب نہ لاتے ہوئے خالق حقیقی سے جاملے ۔ انہوں نے کہا کہ انسانی جانوں کا کوئی نعم البدل نہیں ہوسکتا تاہم ان کے اہل خانہ کو مالی امداد کرنے سے ان کے زخموں پر مرہم رکھنی چاہیے جو کہ بدقسمتی سے ابھی تک ایسا نہیں کیا جاسکا ہے ۔ انہوں نے کہا کہ مذکورہ حادثے کے بعد عوام نے مشتعل ہو کر احتجاج شروع کیا جس پر ڈرائیور اور گاڑی تحویل میں دینے کی تسلی پر احتجاج کو ختم کرایا گیا مگر وہ صرف تسلیاں ہی ثابت ہوئی بلکہ ابھی شہدا کے لواحقین کی کسی قسم کی امداد نہیں کی جاسکی ہے ۔ اس لئے متعلقہ حکام شہدا کے لواحقین کی مالی مدد کے لئے اقدامات اٹھائے تاکہ ان کے خاندانوں کے غم کو کم کیا جاسکے ۔