لگتا ہے شہباز شریف کا نیب میں پرچہ درست نہیں ہوا،شبلی فراز

اسلام آباد: وفاقی وزیر اطلاعات و نشریات شبلی فراز نے کہا ہے کہ لگتا ہے نیب میں پیشی کے بعد شہباز شریف کا پرچہ درست نہیں ہوا،نیب ایک آزاد ادارہ ہے، حکومت کا کوئی لینا دینا نہیں،، عمران خا ن نے اداروں کو افراد کی بجائے قانون کے ماتحت کیا ہے، شہباز شریف نے مشکل وقت میں بھی کورونا کی بجائے اپنی ذات پر توجہ رکھی ہے۔ میڈیا سے گفتگو کرتے ہوئے وفاقی وزیر شبلی فراز نے کہا کہ شہباز شریف کی نیب میں پیشی کے بعد ن لیگ کے لوگوں میں غصہ پایا گیا، نیب ایک آزاد ادارہ ہے، حکومت کا کوئی لینا دینا نہیں، عوام نے شہباز شریف کو لیپ ٹاپ میں دیکھا ہے اس سے باہر نہیں۔وفاقی وزیر نے کہا کہ اقتدار ن لیگ کی سوچ کا ہمیشہ محور رہا ہے، ان کے دور میں نیب کو ہمیشہ سیاسی مقاصد کے لیے استعمال کیا گیا جب کہ ہمارے دور میں نیب ایک آزاد اور خود مختار ادارہ ہے، عمران خا ن نے اداروں کو افراد کی بجائے قانون کے ماتحت کیا ہے۔شبلی فراز کا کہنا تھا کہ شہباز شریف نے مشکل وقت میں بھی کورونا کی بجائے اپنی ذات پر توجہ رکھی، پیشی کے بعد لگتا ہے شہباز شریف کا پرچہ درست نہیں ہوا اور وہ سوالوں کا جواب نہیں دے سکے۔واضح رہے گزشتہ روز آمدن سے زائد اثاثہ جات اور منی لانڈرنگ کیس میں شہباز شریف قومی احتساب بیورو(نیب) لاہور کے سامنے پیش ہوئے تھے۔اس حوالے سے نیب حکام کا کہنا تھا کہ شہباز شریف منی لانڈرنگ سے متعلق سوالوں کے جواب نہ دے سکے اور انویسٹی گیشن ٹیم کو مطمئن نہ کر سکے لہٰذا انہیں 2 جون کو دوبارہ طلب کیا گیا ہے۔