تنخواہ سے محروم رکھ کر ملازمین کی حق تلفی کی جارہی ہے،بیوٹمز ملازمین

کوئٹہ (انتخاب نیوز) بلوچستان یونیورسٹی آف انفارمیشن ٹیکنالوجی انجینئرنگ اینڈ مینجمنٹ سائنسز کے ملازمین کی کور کمیٹی نے اپنے ایک بیان میں جامعہ کے ملازمین کو بقایاجات کے ہمراہ مکمل تنخواہوں کی ادائیگی، ہاوس ریکوزیشن سمیت دیگر مطالبات منظور کرنے کا مطالبہ کرتے ہوئے کہا ہے کہ بیوٹمز اور جامعہ بلوچستان سمیت دیگر جامعات کے ملازمین کو تاحال مکمل تنخواہ ادا نہیں کی گئی ہے جسکی وجہ سے ملازمین میں تشویش پائی جاتی ہے بیان میں کہا گیا ہے کہ تنخواہ ہر ملازم کا بنیادی حق ہے اس سے محروم رکھ کر ملازمین کی حق تلفی کی جارہی ہے۔بیان میں کہا گیا ہے کہ صوبائی حکومت کی جانب سے یونیورسٹی فنانس کمیشن کے ذریعے اڑھائی ارب روپے کے اجراءسے وقتی طور پر تومعاملات حل ہونگے لیکن یہ مسئلے کا مستقل حل نہیں ہے جامعات اس وقت شدید مالی بحران کا شکار ہیں اڑھائی ارب روپے سے صوبے کی جامعات کا مالی بحران حل نہیں ہوگا صوبائی حکومت کو چاہیے کہ وہ جامعات کی گرانٹ کو بڑھا کر 10ارب روپے تک کرے۔بیوٹمز ملازمین کی کورکمیٹی نے اس بات پر زور دیا کہ بیوٹمز کے ملازمین کو ہاوس ریکوزیشن، آرڈر لی الاونس، ڈی آر اے کے بقایاجات سمیت دیگر مطالبات ملازمین کے تمام مطالبات کو فوری طور پر منظور کر کے ملازمین میں پائی جانے والی تشویش اور بے چینی کا خاتمہ کیا جائے۔