اماراتی خلاباز نے خلاء سے مسجدالحرام اور مسجد نبوی ؐ کی ویڈیو شیئر کردی

دبئی(مانیٹرنگ ڈیسک)متحدہ عرب امارات کے خلابازسلطان النیادی نے بین الاقوامی خلائی اسٹیشن(آئی ایس ایس) سے مسجدالحرام اور مسجدِ نبویﷺ کی ویڈیو شیئر کی ہے۔ عرب میڈیا کے مطابق اماراتی خلاباز سلطان النیادی اس وقت بین الاقوامی اسپیس اسٹیشن میں ناسا کے 6 ماہ طویل مشن پر موجود ہیں اور وہیں سے وہ اپنے ٹوئٹر اکاؤنٹ سے باقاعدہ اپ ڈیٹس شیئر کر تے رہتے ہیں۔ رمضان کی27ویں شب کے موقع پر سلطان النیادی نے اپنے آفیشل ٹوئٹر اکاؤنٹ پر خلا سے اسلام کے مقدس ترین مقامات، مکہ مکرمہ اور مدینہ منورہ کی عظیم الشان مساجد مسجد الحرام اور مسجد نبوی کے مناظر شیئر کیے۔اس ویڈیو میں دیکھا جاسکتا ہے کہ خلا سے نیچے زمین پر دکھنے والے اندھیرے میں بظاہر مسجدالحرام اور مسجد نبوی روشن دکھائی دے رہی ہیں۔خلاباز سلطان النیادی رواں ماہ 28 اپریل کو طے شدہ سپیس واک پر جانے کی تیاری کر رہے ہیں جو کہ متحدہ عرب امارات اور کسی بھی دوسرے عرب ملک کے لیے پہلا موقع ہوگا ، اس سے قبل امریکا، کینیڈا، روس اور فرانس سمیت صرف9 دیگر ممالک نے یہ کارنامہ انجام دیا ہے۔اماراتی خلاباز سلطان النیادی نے ناسا کے خلا میں مائیکرو گریوٹی میں انسانی خلیے کی نشونما پر تجربات کیلئے بھیجے گئے مشن کے ہمراہ 2 مارچ کو کینیڈی سپیس سٹیشن سے خلا کا سفر شروع کیا تھا۔