جلا ئوگھیرائو،پولیس پرتشدد کا مقدمہ، پی ٹی آئی رہنماؤں کی عبوری ضمانت میں 16 مئی تک توسیع

لاہور(صباح نیوز)لاہور کی عدالت نے جلا ئوگھیرائو اور پولیس پر تشدد کیس میں پی ٹی آئی رہنمائوں کی عبوری ضمانت میں 16 مئی تک توسیع کر دی۔جمعرات کو زمان پارک میں جلا ئوگھیرائو اور پولیس پر تشدد کیس میں پی ٹی آئی رہنمائوں کی عبوری ضمانتوں پر سماعت ہوئی، پی ٹی آئی رہنما فرخ حبیب، اعجاز چودھری، حماد اظہر اور محمود الرشید عدالت پیش ہوئے۔عدالت نے فرخ حبیب، میاں محمود الرشید اور اعجاز چودھری کو حاضری لگا کر جانے کی اجازت دے دی۔رہنما پی ٹی آئی فواد چودھری نے حاضری معافی کی درخواست دائر کی، درخواست میں موقف اختیار کیا گیا کہ فواد چوہدری حکومت اور پی ٹی آئی مذاکرات کا حصہ ہیں۔عدالت نے حماد اظہر سے استفسار کیا کہ آپ بتائیں کب کی تاریخ رکھیں؟ حماد اظہر نے کہا کہ 14 مئی کو الیکشن، 17 کو اسلام آباد پیش ہونا ہے، اس کے بعد کی کوئی تاریخ رکھ دیں،عدالت نے استفسار کیا کہ کیا 14 مئی کو الیکشن ہو رہا ہے؟حماد اظہر نے کہا کہ قانون کے مطابق تو ہیں، باقی سرکار کا پتہ نہیں۔عدالت نے فواد چوہدری کی حاضری معافی کی درخواست منظور کر لی، عدالت نے فواد چوہدری، فرخ حبیب، حماد اظہر اور دیگر کی عبوری ضمانت میں 16 مئی تک توسیع کر دی۔