پاس منصوبہ 4سال گزرجانے کے باوجود مکمل نہ ہو سکا
حب(رپورٹ/عزیز لاسی)حب بائی پاس منصوبہ 4سال گزرجانے کے باوجود مکمل نہ ہو سکا،منصوبہ 2016-17ء کی صوبائی حکومت کی PSDPمیں 64کروڑ روپے کی لاگت سے حب دریجی گڈانی سے منتخب ممبر صوبائی اسمبلی سردار محمد صالح بھوتانی کی تجویز پر شروع کیا گیا تھا،صوبائی حکومت کی جانب سے محکمہ تعمیرات ومواصلات اور ٹھیکیدار کو منصوبہ اپریل 2020ء میں مکمل کرنے کی تاکید کی گئی تھی اس سلسلے میں بتایا جاتا ہے کہ حب شہر کے درمیان سے گزرنے والی کوئٹہ کراچی قومی شاہراہ N25پر ٹریفک کے دباؤ کو مد نظر رکھتے ہوئے علاقے سے منتخب ممبر صوبائی اسمبلی سردار محمد صالح بھوتانی نے 2016ء میں حب بائی پاس کی تعمیر کے منصوبے کی تجویز دی جس پر اُسوقت کی صوبائی حکومت نے 64کروڑ روپے کی لاگت سے منصوبے کی منظوری دیتے ہوئے 2016-17ء کی PSDPمیں رکھا اور منصوبے پر عملدرآمد کی ذمہ داری محکمہ تعمیر ومواصلات کو سونپی گئی بعدازاں فنڈز کی عدم فراہمی کے سبب متعدد بار منصوبہ تعطل کا شکار رہا تاہم موجودہ حکومت نے ایک بار پھر منصوبے پرکام کی رفتار تیز کرنے کی ہدایت دی اور فنڈز بھی فراہم کئے گئے گزشتہ سال ماہ دسمبر کے وسط میں حکومت بلوچستان کے موجودہ چیف سیکرٹری کیپٹن (ر)فضیل اصغر نے حب آمد پر بائی پاس منصوبے کا معائنہ کیا انہیں بتایا گیا کہ 11کلو میٹر طویل حب بائی پاس منصوبے پر اُسوقت 355ملین روپے کی لاگت سے تقریباً٪60فیصد کام مکمل کیا جاچکا تھا اور رواں مالی سال میں صوبائی حکومت نے منصوبے پر کام کی رفتار تیز کرنے کیلئے 287ملین روپے کے فنڈز بھی فراہم کئے ہیں اور حب بائی پاس منصوبہ اپریل 2020ء تک مکمل کیا جائے گا اور ماہ اپریل میں وزیر اعلیٰ جام کمال خان منصوبے کا باقاعدہ افتتاح کرینگے لیکن صوبائی حکومت کی جانب سے متعلقہ محکمے اور ٹھیکیدار کو منصوبہ کی تکمیل کیلئے دیئے گئے ٹاسک کے مطابق منصوبہ مکمل نہ ہوسکا ہے اور منصوبے کی تکمیل کا مقررہ وقت آپہنچا ہے بتایا جاتا ہے کہ پچھلے کئی دنوں سے منصوبے پر کام مکمل بند ہے اور منصوبے کی سائیٹ پر ٹھیکیدار کی مشینری کھڑی ہے حب ندی پر تعمیر کئے جانے والے پل کی دو چھتیں بھی باقی ہیں جبکہ حب ندی پل سے آگے کراچی کی حدود میں تقریباً4کلو میٹر ایریا میں ابھی تک صرف سطحی کام شروع کیا گیا ہے بتایا جاتا ہے کہ کراچی (سندھ) ایریا میں تقریباً7عدد کلوٹس کی تعمیر اور ارتھ ورک اور بلیک ٹاپ کا کام بھی ابھی تک شروع نہیں کیا جاسکا ہے ذرائع بتاتے ہیں کہ موجودہ صورتحال کے تناظرمیں دیکھا جائے تو حب بائی پاس منصوبہ رواں سال جون یا اس سے بھی آگے تک مکمل کئے جانے کے امکانات ہیں۔
