لانگ مارچ، ہنگامہ آرائی کے مقدمے میں پی ٹی آئی رہنماﺅں کی ضمانت منظور

لاہور (انتخاب نیوز) عدالت نے لانگ مارچ کے دوران توڑپھوڑکرنے اورہنگامہ آرائی کے مقدمے میں پی ٹی آئی رہنماﺅں کی عبوری ضمانت منظورکر لی۔ انسداد دہشت گردی لاہورکی عدالت نے تحریک انصاف کے رہنماﺅں کی 28 جون تک عبوری ضمانت منظورکرتے ہوئے پولیس کو ملزمان کی گرفتاری سے روک دیا۔ پولیس نے تحریک انصاف کے رہنماﺅں کو بھاٹی گیٹ کے مقدمے میں نامزد کیا ہے جبکہ مقدمے میں دہشت گردی کی دفعات شامل کی ہیں۔ عدالت نے تحریکِ انصاف کے رہنماﺅں میں حماد اظہر، ڈاکٹر یاسمین راشد، میاں اسلم اقبال، میاں محمود الرشید، جمشید اقبال چیمہ، مسرت چیمہ، مراد راس، عندلیب عباس سمیت دیگر کی عبوری ضمانت منظور کیں۔ انسداد دہشت گری عدالت نے آئندہ سماعت پر پولیس سے مقدمے کا ریکارڈ طلب کرتے ہوئے تمام ملزمان کو شامل تفتیش ہونے کا بھی حکم دیا۔ پی ٹی آئی رہنماﺅں کی طرف سے برہان معظم ملک ایڈووکیٹ عدالت میں پیش ہوئے۔ دوسری جانب پنجاب اسمبلی میں ہنگامہ آرائی کے مقدمے میں عدالت نے دونوں ملزمان کو پچاس پچاس ہزار روپے کے مچلکے جمع کرانے کا حکم دیتے ہوئے پی ٹی آئی رہنما مراد راس، ندیم عباس بارا کی عبوری ضمانتیں کنفرم کیں۔ عدالت نے یاسمین راشد، سبطین خان، میاں اسلم اقبال، مسرت جمشید اور جمشید چیمہ سمیت دیگر کی ضمانتوں میں 27 جون تک توسیع کی۔