سیکورٹی فورسز کے ہاتھوں جانی نقصان، ٹی ٹی پی میں پھوٹ پڑ گئی، متعدد گروپ مرکزی قیادت سے ناراض

پشاور(آئی این پی) ٹی ٹی پی میں سیکورٹی اداروں کے ہاتھوں بڑھتے جانی نقصان کی وجہ سے پھوٹ پڑگئی۔ نجی ٹی وی کے مطابق ٹی ٹی پی مہمند، سوات اور باجوڑ ایجنسی مرکزی قیادت سے ناراض ہیں اور علیحدگی کیلئے مشاورت کررہے ہیں، اختلافات کی وجوہات میں سے ایک وجہ وسائل کی غیر منصفانہ تقسیم ہے۔ ذرائع کا کہنا ہے کہ مرکزی قیادت کی جانب سے انتظامی امور میں محسود اور وزیر قوموں کو دوسرے قبائل پر فوقیت دینا، مرکزی قیادت کا اہم معاملات میں باقی گروپوں سے مشاورت نہ کرنا، افغان جنگجوﺅں کو پاکستان میں تخریب کاری کیلئے استعمال کرنا بھی اختلافات کی وجہ ہیں۔ اختلافات کے باعث گزشتہ دنوں ٹی ٹی پی باجوڑ کے اہم لیڈر شیخ گل محمد اور سوات کے ڈاکٹر حمود نے مفتی نور ولی کے ساتھ جرگہ بھی کیا تاہم مفتی نورولی کی جانب سے مطالبات ماننے سے انکار پر جرگہ ناکام ہوگیا۔