اس خطے میں شدت پسندی کے بیج بونے میں امریکا کا بڑا کردار ہے، خواجہ آصف

اسلام آباد (مانیٹرنگ ڈیسک)وزیرِ دفاع خواجہ آصف نے کہا ہے کہ اس خطے میں شدت پسندی کے بیج بونے میں امریکا کا بھی بڑا کردار ہے۔خواجہ آصف نے وائٹ ہاؤس کے اعلامیے پر ردعمل دیتے ہوئے کہا کہ اعلامیے سے قبل واشنگٹن یا صدر جوباییڈن کو سوچنا چاہیے تھا، واشنگٹن نے ہی مودی کا گجرات کی شدت پسندی کے باعث ویزا بند کیا تھا۔انہوں نے کہا کہ مودی کشمیر میں شدت پسندی کی ایک مہم کی قیادت کرتا رہا، مودی کے ہاتھ آج بھی مسلمانوں، عیسائیوں اور سکھوں کے خون سے رنگے ہیں۔ امریکا کو اعلامیہ جاری کرتے ہوئے کشمیریوں پر مظالم یاد نہ آئے۔خواجہ آصف نے کہا کہ امریکا نے اس خطے میں 40 سال میں 2 ناکام مداخلتیں کیں، امریکا کی ورثے میں چھوڑی شدت پسندی کا پاکستان آج بھی مقابلہ کر رہا ہے۔خواجہ آصف نے کہا کہ پاکستان شدت پسندی کے خلاف جنگ میں بے شمار جانیں گنوا چکا ہے اور کئی دہائیوں سے مسلسل شدت پسندی کے خلاف جنگ لڑ رہا ہے۔