مریم نوازسے کینیڈین ہائی کمشنر کی ملاقات ،باہمی دلچسپی کے امور پر تبادلہ خیال

لاہور ( این این آئی) پاکستان مسلم لیگ (ن) کی نائب صدر وچیف آرگنائزر مریم نوازشریف سے کینیڈین ہائی کمشنر لیزلی سکینلون نے ملاقات کی جس میں باہمی دلچسپی کے امور پر تبادلہ خیال کیا گیا۔ مریم نوازشریف نے آمد پر کینیڈین ہائی کمشنر کا خیرمقدم کیا۔ اس موقع پر مریم نواز شریف نے کہا کہ پاکستان اور کینیڈا کے درمیان جمہوریت سمیت مختلف شعبوں میں بہترین دوطرفہ تعلقات استوار ہیں، کینیڈا میں مقیم پاکستانی دونوں ممالک کے درمیان دوستی کے رشتوں کو مزید مضبوط بنارہے ہیں، وزیراعظم شہباز شریف نے بیرون ملک پاکستانیوں کے حقوق اور سہولیات کے لئے جامع پیکج دیا ہے، بیرون ملک پاکستانیوں کی جائیدادوں سے متعلق مسائل حل کرنے کے لئے خصوصی عدالتیں بنا رہے ہیں۔انہوں نے کہا کہ موجودہ حکومت نے اوورسیز پاکستانیوں کے حقوق کے تحفظ کے لئے جامع قانون سازی کی ہے، پاکستان اور کینیڈا کے درمیان دوطرفہ تجارت اور سرمایہ کاری کا فروغ وقت کی ضرورت ہے، پاکستان اور کینیڈا کے درمیان عالمی فورمز پر تعاون عالمی امور کے حوالے سے اہم ہے۔ کینیڈا کی ہائی کمشنر نے مریم نوازشریف کی خواتین کے حقوق کے لئے جدوجہد کو سراہا۔ کینیڈا کی ہائی کمشنر نے نیک تمناںکے اظہار اور ملاقات کے لئے وقت دینے پر مریم نوازشریف کا شکریہ ادا کیا۔